തിരുവനന്തപുരം:സംസ്ഥാനത്ത് വെടിമരുന്ന് കൈകാര്യം ചെയ്യുന്ന ലൈസന്സ് അനുവദിക്കുന്നതിലും പുതുക്കി നല്കുന്നതിലും ക്രമക്കേടുകള് നടക്കുന്നെന്ന രഹസ്യ വിവര പ്രകാരം വിജിലന്സ് നടത്തിയ മിന്നല് പരിശോധനയില് ക്രമക്കേടുകള് കണ്ടെത്തി. ‘ഓപ്പറേഷന് വിസ്ഫോടന്’ എന്ന പേരില് സംസ്ഥാനമൊട്ടാകെയാണ് പരിശോധന നടന്നത്.
വെടിമരുന്ന് കൈകാര്യം ചെയ്യുന്നതിനുള്ള ലൈസന്സുകള് നല്കുന്ന സംസ്ഥാനത്തെ 14 ജില്ലകളിലെയും ജില്ലാ കളക്ടറേറ്റുകളും ലൈസന്സ് നേടിയ സ്ഥാപനങ്ങളും കേന്ദ്രീകരിച്ചാണ് പരിശോധന നടന്നത്.
കേരളത്തില് വെടിമരുന്ന് കൈകാര്യം ചെയ്യുന്നതിനുള്ള ലൈസന്സിനുള്ള അപേക്ഷകള് അതത് ജില്ലാ കളക്ടര്മാര് പരിശോധിച്ച ശേഷം 25 കിലോഗ്രാം വരെ വെടിമരുന്ന് കൈകാര്യം ചെയ്യുന്നതിനുള്ള എല് ഇ 5 ലൈസന്സ് നല്കുന്നത് അതാത് ജില്ലാ കളക്ടര്മാരാണ്. 25 കിലോഗ്രാമിന് മുകളില് 500 കിലോഗ്രാം വരെയുള്ള എല് ഇ 1 ലൈസന്സ് കേന്ദ്ര സര്ക്കാരിന് കീഴില് കൊച്ചി ആസ്ഥാനമായി പ്രവര്ത്തിക്കുന്ന പെട്രോളിയം ആന്ഡ് എക്സ്പ്ലോസീവ് സേഫ്റ്റി ഓര്ഗനൈസേഷന്(പെസോ)ന്റെ സബ് സര്ക്കിള് ഓഫീസും 500 കിലോഗ്രാമിന് മുകളില് ഉള്ള എല് ഇ 3 ലൈസന്സ് ചെന്നൈയിലുള്ള പെസോയുടെ സോണല് ഓഫീസുമാണ് നല്കി വരുന്നത്.
ആലപ്പുഴ കളക്ടറേറ്റില് നടന്ന മിന്നല് പരിശോധനയില് ലൈസന്സ് അനുവദിച്ച ചില അപേക്ഷകളില് സമര്പ്പിച്ചിരിക്കുന്ന രേഖകള് അനുസരിച്ചുളള കെട്ടിട നമ്പരിലും വെരിഫിക്കേഷന് റിപ്പോര്ട്ടുകളിലെ കെട്ടിട നമ്പരിലും വൈരുദ്ധ്യങ്ങള് ഉണ്ടായിരുന്നു. മറ്റൊരു അപേക്ഷയില് കെട്ടിട നികുതി ഒടുക്കിയ രസീതിലെ കെട്ടിട നമ്പരിലും തഹസീല്ദാരുടെ റിപ്പോര്ട്ടിലും അഗ്നിസുരക്ഷാ സേനയുടെ റിപ്പോര്ട്ടിലും വെവ്വേറെ കെട്ടിട നമ്പരുകള് രേഖപ്പെടുത്തിയിട്ടുള്ളതായും വിജിലന്സ് കണ്ടെത്തി.
ഇടുക്കി ജില്ലയില് 2022 ജൂണ് മാസത്തില് മരിച്ച ലൈസന്സിയുടെ ലൈസന്സ് ഇതു വരെ റദ്ദു ചെയ്തിട്ടില്ല.പാലക്കാട് ജില്ലയില് ക്രൈംകേസില് ഉള്പ്പെട്ട പ്രതിയ്ക്ക് ജില്ലാ പൊലീസ് മേധാവിയുടെ റിപ്പോര്ട്ട് കണക്കിലെടുക്കാതെ വെടിമരുന്ന് കൈകാര്യം ചെയ്യുന്നതിനുള്ള ലൈസന്സ് അനുവദിച്ചു.കോട്ടയം ജില്ലയിലെ ചങ്ങനാശേരിയിലും പൊലീസ് റിപ്പോര്ട്ട് പരിഗണിക്കാതെ ലൈസന്സ് പുതുക്കി നല്കിയതായും കണ്ടെത്തി.
സംസ്ഥാനമെമ്പാടും നടത്തിയ പരിശോധനയില് വെടിമരുന്ന് നല്കുന്നതിനും പുതുക്കുന്നതിനുമായി സമര്പ്പിക്കപ്പെട്ടിട്ടുള്ള അപേക്ഷകളില് 822 അപേക്ഷകള് നിലവില് തീര്പ്പ് കല്പിക്കാതെ വിവിധ കളക്ടറേറ്റുകളില് ഉളളതായി വ്യക്തമായി. ഇവയില് കോഴിക്കോട് 345, എറണാകുളം 185, മലപ്പുറം 74, പാലക്കാട് 48, കണ്ണൂര് 40, തിരുവനന്തപുരം 31, കാസര്കോഡ്, തൃശൂര് 28 വീതവും ആലപ്പുഴ 16, കൊല്ലം 15, കോട്ടയം 5, വയനാട് 4, പത്തനംതിട്ട 3 എന്നിങ്ങനെ അപേക്ഷകള് തീര്പ്പ് കല്പ്പിക്കാതിരിക്കുന്നതായും കണ്ടെത്തിയിട്ടുണ്ട്.ഇന്നലെ ആരംഭിച്ച മിന്നല് പരിശോധന രാത്രി വൈകിയാണ് പൂര്ത്തിയായത്.
