തിരുവനന്തപുരം:മലപ്പുറം ജില്ലയിലെ വണ്ടൂരില്‍ നിപ ബാധിച്ച് യുവാവ് മരിച്ചതിന് പിന്നാലെ രോഗലക്ഷണങ്ങള്‍ ഉണ്ടെന്ന സംശയത്തില്‍ പരിശോധനയ്‌ക്കയച്ച 13 ഫലങ്ങളും നെഗറ്റീവ്. ഹൈ റിസ്‌ക് ഗണത്തിലെ 13 പേരുടെയും സ്രവ പരിശോധന ഫലങ്ങളാണ് നെഗറ്റീവ് ആയത്.
നിപ ബാധിച്ച് മരിച്ച യുവാവിന്റെ സമ്പര്‍ക്ക പട്ടികയില്‍ 175 പേരാണുണ്ടായിരുന്നത്. 13 സാമ്പിളുകള്‍ നെഗറ്റീവായി. 26 പേര്‍ ഹൈറിസ്‌ക് കാറ്റഗറിയിലാണ്.
ആശങ്കപ്പെടേണ്ട സാഹചര്യം നിലവിലില്ലെന്ന് ആരോഗ്യ മന്ത്രി വീണ ജോര്‍ജ് അറിയിച്ചു. രോഗവ്യാപനം ഇല്ലെന്ന് ഉറപ്പാക്കാനാണ് ശ്രമം.
രോഗവ്യാപന സാധ്യത കുറവാണെങ്കിലും ലക്ഷണമുള്ള മുഴുവന്‍ ആളുകളുടെയും സാമ്പിള്‍ പരിശോധിക്കും. മരിച്ച യുവാവ് ബാംഗ്ലൂരിലാണ് പഠിച്ചതെന്നതിനാല്‍ കര്‍ണാടക സര്‍ക്കാരുമായി ആശയവിനിമയം നടത്തിയിട്ടുണ്ടെന്നും മന്ത്രി പറഞ്ഞു.
അതിനിടെ വാനരവസൂരിയെന്ന സംശയത്തില്‍ മഞ്ചേരി ആശുപത്രിയില്‍ ചികിത്സയിലുളള യുവാവിന്റെ സാമ്പിള്‍ പരിശോധനഫലം വന്നിട്ടില്ല.
യുവാവ് തുടക്കം മുതല്‍ മുന്‍കരുതലുകള്‍ എടുത്തിരുന്നു. കേന്ദ്ര ആരോഗ്യമന്ത്രിയെ കാണുമെന്നും നിപ അടക്കം വിഷയങ്ങള്‍ ചര്‍ച്ച ചെയ്യുമെന്നും മന്ത്രി വീണാ ജോര്‍ജ് അറിയിച്ചു.
