ന്യൂദല്ഹി: ഛത്തിസ്ഗഡിലെ മാവോയിസ്റ്റ് കേന്ദ്രങ്ങളില് സൈനിക ശക്തി വര്ധിപ്പിച്ച് കേന്ദ്രസര്ക്കാര്. മാവോയിസ്റ്റുകളെ 2026 മാര്ച്ചിനുള്ളില് തുടച്ചുനീക്കുമെന്ന കേന്ദ്ര ആഭ്യന്തര മന്ത്രി അമിത്ഷായുടെ പ്രഖ്യാപനത്തിന് പിന്നാലെയാണ് നടപടി. ദക്ഷിണ ബസ്തര് മേഖലയില് നാലായിരം സിആര്പിഎഫ് ഭടന്മാരെയാണ് അധികം നിയോഗിച്ചത്.
നാലായിരം സൈനികര് അടങ്ങുന്ന സേനയുടെ നാല് ബറ്റാലിയനുകളെ ഝാര്ഖണ്ഡിലെയും ബിഹാറിലെയും കേന്ദ്രങ്ങളില്നിന്ന് അടുത്തിടെ പിന്വലിച്ചിരുന്നു. ഇവിടങ്ങളിലെ മാവോയിസ്റ്റ് ഭീകരതയ്ക്ക് ഏറെക്കുറെ അവസാനം കാണാനായതിന്റെ പശ്ചാത്തലത്തിലാണ് ഇവരെ പിന്വലിച്ചത്. നൂറ് കണക്കിന് മാവോയിസ്റ്റുകള് ബിഹാറിലും ഝാര്ഖണ്ഡിലുമായി കീഴടങ്ങിയിരുന്നു. ഝാര്ഖണ്ഡില് നിന്ന് മൂന്ന് ബറ്റാലിയനുകളും ബിഹാറില് നിന്ന് ഒരു ബറ്റാലിയനുമാണ് ഛത്തീസ്ഗഡിലേക്ക് എത്തുന്നത്.
സര്ക്കാരിനും പ്രാദേശിക ഭരണകൂടങ്ങള്ക്ക് എത്തിച്ചേരുന്നതിന് തടസമുണ്ടായിരുന്ന മാവോയിസ്റ്റ് ശക്തികേന്ദ്രങ്ങളില് സിആര്പിഎഫ് നൂറിലധികം ഫോര്വേഡ് ഓപ്പറേറ്റിങ് ബേസുകള് (എഫ്ഒബി) സ്ഥാപിച്ചിട്ടുണ്ട്. ദക്ഷിണ ബസ്തറില് ഈ വര്ഷം ഇതുവരെ 10 എഫ്ഒബികള് സ്ഥാപിച്ചതായി സിആര്പിഎഫ് വൃത്തങ്ങള് അറിയിച്ചു.
