കോട്ട ; വയറുവേദനയുമായെത്തിയ 70 കാരന്റെ വയറ്റിൽ നിന്ന് നീക്കം ചെയ്തത് 6000 ത്തോളം കല്ലുകൾ . രാജസ്ഥാനിലെ കോട്ടയിലെ സ്വകാര്യ ആശുപത്രിയിലെ ഡോക്ടർമാരാണ് ആറ് ശസ്ത്രക്രിയകൾ നടത്തി കല്ലുകൾ നീക്കം ചെയ്തത് . ബുണ്ടി ജില്ലയിലെ പദംപുരയിൽ നിന്നുള്ള വയോധികൻ കഴിഞ്ഞ 18 മാസമായി വയറുവേദന, ഗ്യാസ്, ഛർദ്ദി എന്നിവയാൽ ബുദ്ധിമുട്ടുന്നുണ്ടായിരുന്നു . നേരത്തെ കോട്ടയിലെ സ്വകാര്യ ആശുപത്രിയിൽ ചികിൽസിച്ചെങ്കിലും ശസ്ത്രക്രിയ നടത്താൻ നിർദേശിച്ചിരുന്നു
ഇതിന് മുന്നോടിയായാണ് സെപ്തംബർ ആറിന് ഡോക്ടർമാർ സോണോഗ്രാഫിക്ക് വിധേയനാക്കിയത് .പരിശോധനയിൽ പിത്തസഞ്ചിയിൽ പിത്തരസം ഇല്ലെന്നും അതിന്റെ വലിപ്പം 12×4 സെൻ്റിമീറ്ററാണെന്നും കണ്ടെത്തി. പിത്തസഞ്ചി മുഴുവനായും കല്ലുകൾ കൊണ്ട് നിറയുകയും ഇരട്ടി വലിപ്പമായതായും കണ്ടെത്തി. സാധാരണയായി പിത്തസഞ്ചിയുടെ വലിപ്പം ഏകദേശം 7×4 സെൻ്റിമീറ്ററാണ്. എന്നാൽ ഇതിന്റെ വലിപ്പം കൂടിയത് ശസ്ത്രക്രിയ ചെയ്യുന്ന ഡോക്ടർമാർക്ക് വെല്ലുവിളിയായി.
ലാപ്രോസ്കോപ്പിക് സർജൻ ഡോ.ദിനേശ് കുമാറിന്റെ നേതൃത്വത്തിലുള്ള മെഡിക്കൽ സംഘമാണ് ശസ്ത്രക്രിയ നടത്തിയത്. സങ്കീർണ്ണമായ ഓപ്പറേഷനിലൂടെ പിത്താശയം പൂർണമായും നീക്കം ചെയ്തു. കല്ലുകൾ നീക്കം ചെയ്തില്ലെങ്കിൽ പാൻക്രിയാസ് വീക്കം, മഞ്ഞപ്പിത്തം, ക്യാൻസർ എന്നിവയ്‌ക്ക് സാധ്യതയുണ്ടെന്നും ഡോ.ദിനേശ് പറഞ്ഞു.
