കൊച്ചി: നടന്‍ ജയസൂര്യക്കെതിരായ ലൈംഗികാതിക്രമ പരാതി ഞെട്ടിച്ചെന്ന് നടി നൈല ഉഷ. താരം അടുത്ത സുഹൃത്താണ്. ഒരു വിദേശ മാദ്ധ്യമത്തിന് നല്‍കിയ അഭിമുഖത്തിലാണ് ഈ വെളിപ്പെടുത്തല്‍.
സിനിമയില്‍ തനിക്ക് മോശം അനുഭവങ്ങളുണ്ടായിട്ടില്ല. ദുരനുഭവങ്ങള്‍ നേരിട്ടവരുടെ ഒപ്പം നിന്നുകൊണ്ടാണ് ഇത് പറയുന്നത്. ഇതുവരെ അഭിനയിച്ച സിനിമകളിലേക്കെല്ലാം തന്നെ ക്ഷണിച്ചതാണ്. വേണ്ട എല്ലാ സൗകര്യങ്ങളും അവര്‍ ചെയ്തുതന്നു. എന്നാല്‍ അത്തരം സാഹചര്യം ഇല്ലാത്തവര്‍ക്കൊപ്പമാണ് താന്‍ നില്‍ക്കുക.
സിനിമയിലേയ്‌ക്ക് ക്ഷണിക്കപ്പെടുന്നതും ഓഡിഷനിലൂടെ അവസരം ചോദിച്ചുവരുന്നതും തമ്മില്‍ വലിയ വ്യത്യാസമുണ്ടെന്ന് നൈല ഉഷ പറഞ്ഞു. കൂടുതലും അഡ്ജസ്റ്റ്മെന്റ് ചോദ്യങ്ങള്‍ നേരിടേണ്ടി വരുന്നത് അവസരം ചോദിച്ചു വരുന്നവര്‍ക്കാണ്.തനിക്കൊപ്പം ജോലി ചെയ്തിട്ടുള്ളയാരും ഇത്തരം അനുഭവങ്ങള്‍ നേരിട്ടതായി പറഞ്ഞിട്ടില്ല. എന്നാല്‍ അങ്ങനെ സംഭവിക്കുന്നതായി അറിയാം.
ജയസൂര്യക്കെതിരെ പീഡനക്കേസ് വന്നതിന് ശേഷം അദ്ദേഹവുമായി സംസാരിച്ചിട്ടില്ല.ആരോപണം ഞെട്ടിച്ചുവെന്ന് പറയുമ്പോള്‍ ആ സ്ത്രീയെ അവിശ്വസിക്കുന്നുവെന്നോ ജയസൂര്യക്കൊപ്പം നില്‍ക്കുന്നുവെന്നോ അര്‍ത്ഥമില്ലെന്നും നൈല ഉഷ വെളിപ്പെടുത്തി.
മാറ്റം ഇവിടെനിന്ന് തുടങ്ങട്ടെ. എന്തായാലും മലയാള സിനിമയില്‍ ഒരുപാട് മാറ്റങ്ങള്‍ സംഭവിക്കാന്‍ പോവുകയാണ്.
ദുരനുഭവങ്ങള്‍ ഉണ്ടായിട്ടില്ലെന്ന് ജോമോള്‍ പറഞ്ഞത് അവരുടെ അനുഭവമാണ്. തനിക്കും ദുരനുഭവങ്ങള്‍ ഉണ്ടായിട്ടില്ല. എന്നാല്‍ അത്തരം പ്രശ്‌നങ്ങള്‍ നേരിട്ടവര്‍ക്കൊപ്പമാണ് താന്‍ നില്‍ക്കുക. ഈ ഇന്‍ഡസ്ട്രിയില്‍ ജോലി ചെയ്യുമ്പോള്‍ നേരിട്ട് മോശം അനുഭവം ഉണ്ടായില്ലെങ്കിലും അത്തരം അനുഭവങ്ങള്‍ പലരില്‍ നിന്നും സ്വാഭാവികമായും കേള്‍ക്കാമല്ലോ. ചിലപ്പോള്‍ ആളുകള്‍ നിങ്ങളുടെ കതകില്‍ മുട്ടിയേക്കാം. എന്നാല്‍ ധൈര്യത്തോടെ നോ പറയണെന്ന് നൈല ഉഷ നിലപാട് വ്യക്തമാക്കി.
