ഗോഹട്ടി : അസം നിയമസഭയിലെ മുസ്ലീം അംഗങ്ങള്ക്ക് വെള്ളിയാഴ്ച ഉച്ചയ്ക്ക് പ്രാര്ത്ഥനയ്ക്കായി നല്കിയിരുന്ന രണ്ട് മണിക്കൂര് ഇടവേള ഒഴിവാക്കി. നിയമസഭയുടെ അടുത്ത സമ്മേളനം മുതല് ഈ നിയമം നിലവില് വരും.
വെള്ളിയാഴ്ചകളിലെ നടപടിക്രമങ്ങള് മറ്റ് ദിവസങ്ങളിലേതിന് സമാനമായിരിക്കും.കോളോണിയല് രീതികളില് നിന്നുള്ള മോചനമാണിതെന്ന് മുഖ്യമന്ത്രി ഹിമന്ത ബിശ്വ ശര്മ പ്രതികരിച്ചു.
ബ്രിട്ടീഷ് ഭരണ കാലം മുതല്, മുസ്ലീം നിയമസഭാ സാമാജികര്ക്ക് വെള്ളിയാഴ്ച നമസ്കരിക്കുന്നതിന് അസം നിയമസഭയുടെ സമ്മേളനത്തില് ഇടവേള നല്കുന്ന രീതിയുണ്ടായിരുന്നു. സയ്യിദ് സാദുലയുടെ കാലം മുതല് നിലനിന്നിരുന്ന ഈ സമ്പ്രദായമാണ് അസം നിയമസഭ നിര്ത്തലാക്കിയത്. രാജ്യത്ത് ഒരു സംസ്ഥാനത്തും നമാസിന് ഇടവേള നല്കുന്ന ഇത്തരമൊരു സംവിധാനം ഇല്ലെന്ന് ബി ജെ പി എം എല് എ ബിശ്വജിത്ത് ഫുക്കന് നിയമസഭയില് പറഞ്ഞു.
നിയമസഭാ ചട്ടങ്ങളിലെ റൂള്-11 ഭേദഗതി ചെയ്താണ് നമാസിന്റെ ഇടവേള ഒഴിവാക്കിയത്. ഈ തീരുമാനത്തെ ആരും എതിര്ത്തിട്ടില്ല. തീരുമാനം വെളളിയാഴ്ച സഭ ഐകകണ്ഠ്യേനയാണ് അംഗീകരിച്ചത്.അസമില് മുസ്ലിം വിവാഹ നിയമം റദ്ദാക്കാനുള്ള ബില് നിയമസഭ കഴിഞ്ഞ ദിവസം പാസാക്കിയിരുന്നു. ഇതിലൂടെ മുസ്ലീം വിവാഹ, വിവാഹമോചന രജിസ്ട്രേഷന് നിയമം, 1935, അസം റിപ്പീലിംഗ് ഓര്ഡിനന്സ് 2024 എന്നിവയാണ് റദ്ദാക്കപ്പെട്ടത്.
ബാലവിവാഹങ്ങള് അവസാനിപ്പിക്കുക, മുസ്ലീം വിവാഹങ്ങളും വിവാഹമോചനങ്ങളും സര്ക്കാര് സംവിധാനങ്ങളുടെ പരിധിയിലായിരിക്കുക എന്നിവ ലക്ഷ്യമിട്ടാണ് സര്ക്കാര് ഇത്തരമൊരു നടപടി സ്വീകരിച്ചതെന്നാണ് വിശദീകരണം. എന്നാല് ഏകീകൃത സിവില് കോഡ് ഘട്ടം ഘട്ടമായി നടപ്പാക്കുകയാണ് ഈ നീക്കത്തിന് പിന്നിലെന്ന് പ്രതിപക്ഷം ആരോപിച്ചു.
