തൃശ്ശൂര്: ചെറുതുരുത്തി ടൗണിലെ കെട്ടിടത്തിനു മുകളില് കഞ്ചാവ് ചെടി. ടൗണിലെ സൂപ്പര്മാര്ക്കറ്റിന്റെ മുകളിലെ നിലയിലാണ് കഞ്ചാവ് ചെടി കണ്ടെത്തിയത്. അഞ്ചടിയോളം വളര്ച്ചയെത്തിയ കഞ്ചാവ് ചെടിയാണ് കണ്ടെത്തിയത്.
ചെറുതുരുത്തി സബ് ഇന്സ്പെക്ടര് എ.ആര് നിഖിലിന് ലഭിച്ച രഹസ്യ വിവരത്തിന്റെ അടിസ്ഥാനത്തില് നടത്തിയ അന്വേഷണത്തിലാണ് കഞ്ചാവ് ചെടി കണ്ടെത്തിയത്.ചെറുതുരുത്തി പോലീസ് സ്റ്റേഷനില് നിന്ന് 50 മീറ്റര് മാത്രം അകലെയായി ടൗണില് സ്ഥിതിചെയ്യുന്ന ബിസ്മി സൂപ്പര്മാര്ക്കറ്റിന്റെ മുകളിലായാണ് കഞ്ചാവ് ചെടി കണ്ടെത്തിയത്. ഇവിടെ നിറയെ മാലിന്യങ്ങള് കൂടിക്കിടക്കുന്നുണ്ടായിരുന്നു.
നിരവധി മദ്യക്കുപ്പികളും ഇവിടെ പൊലീസ് സംഘം കണ്ടെത്തി. റോഡില് നിന്ന് നോക്കുന്ന ആളുകള് കാണാതിരിക്കുന്നതിന് വേണ്ടി ചെടി മറച്ച രീതിയില് ആയിരുന്നു ഉണ്ടായിരുന്നത്. സംഭവത്തില് പൊലീസ് അന്വേഷണം തുടങ്ങിയിട്ടുണ്ട്. ചെറുതുരുത്തിയില് കോഴിഫാമിന്റെ മറവില് ലഹരി കച്ചവടം നടത്തിയ സംഭവത്തില് നേരത്തെ പൊലീസ് രണ്ട് പേരെ അറസ്റ്റ് ചെയ്തിരുന്നു
