തിരുവനന്തപുരം: കഴക്കൂട്ടത്ത് നിന്നും കാണാതായ ആസാമീസ് പെണ്കുട്ടി തസ്മിദ് തംസുമിന് ചെന്നൈയിലെത്തിയെന്ന് സ്ഥിരീകരണം. കുട്ടി ട്രെയിന് ഇറങ്ങുന്നതിന്റെ ദൃശ്യങ്ങള് പുറത്തുവന്നു.
വിവരം ലഭിച്ച കഴക്കൂട്ടം പൊലീസ് ചെന്നൈയിലേക്ക് പുറപ്പെട്ടു. അതേസമയം, പെണ്കുട്ടി ചെന്നൈയില് നിന്നും അസം തലസ്ഥാനമായ ഗുഹാവത്തിയിലേക്ക് പോകാന് സാധ്യതയുണ്ടെന്നാണ് പൊലീസ് നിഗമനം.
ഗുഹാവത്തി എക്സ് പ്രസ് ബുധനാഴ്ച രാവിലെ 10.45 ന് ചെന്നൈയില് നിന്നു പുറപ്പട്ടിട്ടുണ്ട്. കുട്ടി ഈ ട്രെയിനില് കയറിയോ എന്നാണ് സംശയം.
ചെന്നൈ – എഗ്മൂര് എക്സ്പ്രസില് പെണ്കുട്ടി കയറിയെന്ന് നേരത്തെ പൊലീസ് സ്ഥിരീകരിച്ചിരുന്നു. കന്യാകുമാരിയില് നിന്ന് ട്രെയിന് പുറപ്പെടുന്നതിന്ന് അല്പ്പം മുമ്പ് കുട്ടി ചെന്നൈ-എഗ്മൂര് എക്സ്പ്രസില് കയറിയെന്നാണ് പൊലീസ് വ്യക്തമാക്കിയത്. ഈ സാഹചര്യത്തില് തിരുവനന്തപുരം പൊലീസ് കമ്മീഷണറുടെ നിര്ദ്ദേശ പ്രകാരം ഒരു സംഘം പൊലീസ് ഉദ്യോഗസ്ഥര് അസമിലേക്കും പോകാന് തീരുമാനിച്ചിരുന്നു.
അമ്മ വഴക്കുപറഞ്ഞതിനെത്തുടര്ന്നാണ് പതിമൂന്നൂകാരിയായ തസ്മിദ് തംസും കഴക്കൂട്ടത്തെ വാടകവീട്ടില്നിന്ന് ഇറങ്ങിപ്പോയത്. ചൊവ്വാഴ്ച രാവിലെ പത്തുമണിയോടെയാണ് പെണ്കുട്ടിയെ കാണാതായത്. തിരുവനന്തപുരം തമ്പാനൂര് റെയില്വെ സ്റ്റേഷനിലെത്തി ബംഗളൂരു-കന്യാകുമാരി ട്രെയിനില് കയറി പോവുകയായിരുന്നു എന്ന് നേരത്തേ കണ്ടെത്തിയിരുന്നു.
