മേപ്പാടി: ദുരന്തത്തില് രക്ഷപ്പെട്ടത് രണ്ടാം ജന്മം, പ്രധാനമന്ത്രി ആശ്വസിപ്പിക്കാനെത്തിയതില് ഏറെ സന്തോഷം. രണ്ടും അവിശ്വസനീയമെന്ന് അരുണ്. ശരീരമാകെ പരിക്കുകളാണ്. കാലിലും പുറത്തുമൊക്കെ പരിക്കുകളുണ്ട്. വേദനകള്ക്കിടയിലും അരുണിന്റെ മുഖത്ത് ചിരി വിരിയുന്നു, തോളില് ചേര്ത്തു പിടിച്ച് പ്രധാനമന്ത്രി ആശ്വസിപ്പിച്ചതിന്റെ ചിരി.
ആദ്യത്തെ ഉരുള്പൊട്ടലില് വീട് തകര്ന്നു. താന് ചെളിയിലാണ്ടു. ഇത് കണ്ട് ആര്ത്തലച്ച് അമ്മ ഭാര്ഗവി അടുത്ത വീട്ടുകാരെ വിളിക്കാനോടിയതാണ്. ഉടനെ ദുരിത പ്രവാഹത്തിന്റെ രണ്ടാം വരവ്. ഭാഗ്യത്തിന് അമ്മ അതില് പെട്ടില്ല. അമ്മ ക്യാംപിലാണ്. ചളിയില് പൂണ്ട് കിടന്നത് മണിക്കൂറുകളാണ്. അളിയന് വിപിനാണ് ആശുപത്രിയില് കൂട്ടിരിപ്പിനുള്ളത്. രണ്ട് കാലിനും നല്ല പരിക്കുണ്ട്. എല്ലാം തകര്ന്നവര്ക്കിടയില് ജീവനെങ്കിലും തിരിച്ചുകിട്ടിയല്ലോ, ഇപ്പോള് പ്രധാനമന്ത്രിയുടെ ചേര്ത്തു പിടിക്കലും. ആശ്വാസ തീരത്തേക്കാണ് അരുണ്.
