മനുഷ്യരാശിയുടെ ചരിത്രത്തില് ചില ഭക്ഷ്യവിളകള് വെറും ഭക്ഷണമല്ല, ഒരു സംസ്കാരത്തിന്റെ തന്നെ അടിത്തറയാണ്. അത്തരത്തില് മനുഷ്യജീവിതത്തെയും കൃഷിയെയും പ്രകൃതിയെയും ഒരുപോലെ സംരക്ഷിച്ച ധാന്യവിഭാഗമാണ് മില്ലറ്റുകള് അഥവാ ചെറുധാന്യങ്ങള്. ഒരു കാലത്ത് നമ്മുടെ പൂര്വ്വികരുടെ പ്രധാന ഭക്ഷണമായിരുന്നതും എന്നാല് നൂതന ഭക്ഷണരീതികളാല് അന്യം നിന്നുപോയതുമായ ഈ പോഷകക്കലവറയെ ഭാരതത്തിന്റെ പ്രധാനമന്ത്രി നരേന്ദ്ര മോദിയുടെ നേതൃത്വത്തില് ഇന്ന് നമ്മുടെ ഭക്ഷ്യസംസ്കാരത്തിലേക്ക് തിരികെ എത്തിക്കുകയാണ്.
ഇന്ന് ലോകം വീണ്ടും മില്ലറ്റുകളെക്കുറിച്ച് സംസാരിക്കുന്നു. ആരോഗ്യം, പോഷകസുരക്ഷ, ഭക്ഷ്യസുരക്ഷ, കാലാവസ്ഥാ വ്യതിയാനം, ജലസംരക്ഷണം എന്നിവയെക്കുറിച്ചുള്ള എല്ലാ ആഗോള ചര്ച്ചകളിലും മില്ലറ്റുകള്ക്ക് പ്രധാന സ്ഥാനം ലഭിച്ചിരിക്കുന്നു. എന്നാല് ഈ അംഗീകാരം ഒരു പുതിയ കണ്ടെത്തലിനല്ല, മറിച്ച് അയ്യായിരം വര്ഷങ്ങള്ക്ക് മുമ്പ് മനുഷ്യസംസ്കാരത്തെ പോഷിപ്പിച്ച ഒരു മഹത്തായ പാരമ്പര്യത്തിന്റെ പുനരുജ്ജീവനമാണ്.
സിന്ധു നദീതട സംസ്കാരത്തിലെ മില്ലറ്റുകള്
പുരാവസ്തു ഗവേഷണങ്ങള് സൂചിപ്പിക്കുന്നത് ക്രിസ്തുവിന് മുമ്പ് 3000 വര്ഷങ്ങള്ക്ക് മുമ്പുതന്നെ ഇന്ത്യന് ഉപഭൂഖണ്ഡത്തില് മില്ലറ്റുകള് കൃഷിചെയ്തിരുന്നതായാണ്. സിന്ധു നദീതട സംസ്കാരത്തിലെ ജനങ്ങള് ഉപയോഗിച്ചിരുന്ന പ്രധാന ഭക്ഷ്യവിളകളില് മില്ലറ്റുകളും ഉള്പ്പെട്ടിരുന്നു.
വരള്ച്ചയെ അതിജീവിക്കാനും കുറഞ്ഞ മഴയിലും വളരാനും കഴിയുന്ന ഈ ധാന്യങ്ങള് മനുഷ്യന്റെ ആദ്യകാല ഭക്ഷ്യസുരക്ഷയുടെ പ്രധാന അടിത്തറയായി മാറി. ഭാരതത്തിലെ ഗ്രാമീണ ജീവിതം നൂറ്റാണ്ടുകളോളം മില്ലറ്റുകളെ ആശ്രയിച്ചായിരുന്നു മുന്നേറിയത്.
കേരളത്തില്: ചാമ, തിന, വരക്, കുതിരവാലി, കൊറലെ, പനിവരക് എന്നിവ ജനപ്രിയമായിരുന്നു.
ഭാരതത്തിന്റെ മറ്റ് ഭാഗങ്ങളില്: റാഗി, ബജ്റ, മണിച്ചോളം എന്നിവ നിത്യഭക്ഷണത്തിന്റെ ഭാഗമായിരുന്നു.
ഹരിതവിപ്ലവവും ചെറുധാന്യങ്ങളുടെ പിന്നാക്കയാത്രയും
1960-കളിലെ ഹരിതവിപ്ലവം ഭാരതത്തിന്റെ ഭക്ഷ്യോല്പാദനത്തില് വലിയ നേട്ടങ്ങള് കൈവരിച്ചെങ്കിലും, അരിയുടെയും ഗോതമ്പിന്റെയും അമിത വ്യാപനത്തോടെ മില്ലറ്റുകള് ക്രമേണ കൃഷിയിടങ്ങളില് നിന്നും ഭക്ഷണമേശകളില് നിന്നും അപ്രത്യക്ഷമായി.
ജനങ്ങള് കൂടുതല് പോളിഷ് ചെയ്ത അരിയിലേക്കും സംസ്കരിച്ച ഭക്ഷണങ്ങളിലേക്കും മാറി. ഇതിന്റെ ഫലമായി ഭക്ഷണത്തിലെ നാരുകളുടെ (ഫൈബര്) അളവും മറ്റ് പോഷകഘടകങ്ങളും ഗണ്യമായി കുറഞ്ഞു. ഇതോടെയാണ് പ്രമേഹം, അമിതവണ്ണം, ഹൃദ്രോഗം, രക്തസമ്മര്ദ്ദം തുടങ്ങിയ ജീവിതശൈലി രോഗങ്ങള് സമൂഹത്തില് വര്ധിക്കാന് തുടങ്ങിയത്.
ലോകത്തെ മില്ലറ്റുകളിലേക്ക് നയിച്ച് ഭാരതം
ഇരുപത്തിയൊന്നാം നൂറ്റാണ്ടില് കാലാവസ്ഥാ വ്യതിയാനം, ജലക്ഷാമം, പോഷകാഹാരക്കുറവ് തുടങ്ങിയ വെല്ലുവിളികള് ശക്തമായപ്പോള് ലോകം വീണ്ടും മില്ലറ്റുകളുടെ പ്രാധാന്യം തിരിച്ചറിഞ്ഞു. ഈ സാഹചര്യത്തിലാണ് ഭാരതം ആഗോളതലത്തില് ചരിത്രപരമായ നീക്കം നടത്തിയത്.
ഐക്യരാഷ്ട്രസഭയില് ഭാരതം മുന്നോട്ടുവച്ച പ്രമേയത്തെ തുടര്ന്ന് 2023-നെ ‘അന്താരാഷ്ട്ര ചെറുധാന്യ വര്ഷം’ ആയി പ്രഖ്യാപിച്ചു. ലോകത്തെ 70-ലധികം രാജ്യങ്ങള് ഈ നിര്ദേശത്തെ പിന്തുണച്ചതോടെ ഭാരതത്തിന്റെ പരമ്പരാഗത ഭക്ഷ്യജ്ഞാനത്തിന് ആഗോള അംഗീകാരം ലഭിച്ചു.
നരേന്ദ്ര മോദിയും മില്ലറ്റ് പ്രസ്ഥാനവും
പ്രധാനമന്ത്രി നരേന്ദ്ര മോദി മില്ലറ്റുകളെ ജനകീയമാക്കുന്നതില് നിര്ണായക പങ്കുവഹിച്ചു. അദ്ദേഹം മില്ലറ്റുകളെ ‘ശ്രീ അന്ന’ എന്ന പേരില് വിശേഷിപ്പിക്കുകയും ഭാരതത്തിന്റെ പുരാതന കാര്ഷിക പാരമ്പര്യത്തിന്റെയും ആരോഗ്യസംസ്കാരത്തിന്റെയും പ്രതീകമായി അവതരിപ്പിക്കുകയും ചെയ്തു.
ദേശീയ-അന്തര്ദേശീയ വേദികളിലും ജി 20 അധ്യക്ഷസ്ഥാനകാലത്തും അദ്ദേഹം മില്ലറ്റുകളുടെ പോഷകമൂല്യവും പരിസ്ഥിതി സൗഹൃദ സ്വഭാവവും ഉയര്ത്തിക്കാട്ടി. പ്രധാനമന്ത്രിയുടെ കാഴ്ചപ്പാടില് മില്ലറ്റുകള് ഒരു ഭക്ഷണം മാത്രമല്ല; അത് കര്ഷകന്റെ സാമ്പത്തിക സുരക്ഷ, ജനങ്ങളുടെ ആരോഗ്യം, കാലാവസ്ഥാ പ്രതിരോധശേഷിയുള്ള കൃഷി, ഭാവിയിലെ ഭക്ഷ്യസുരക്ഷ എന്നിവയ്ക്കുള്ള സമഗ്ര പരിഹാരമാണ്.
എന്തുകൊണ്ട് മില്ലറ്റുകള്?
കുറഞ്ഞ വിഭവങ്ങള്, ഉയര്ന്ന പ്രതിരോധം: വളരെ കുറഞ്ഞ വെള്ളം മാത്രം മതി, വരള്ച്ചയെ അതിജീവിക്കും. രാസവളങ്ങളുടെ ആവശ്യം കുറവാണ്, കാര്ബണ് പുറന്തള്ളല് പരിമിതപ്പെടുത്തുന്നു.
പോഷകങ്ങളുടെ കലവറ: ഉയര്ന്ന അളവില് നാരുകള് അടങ്ങിയിരിക്കുന്നു. ഇരുമ്പ്, കാല്സ്യം, മഗ്നീഷ്യം തുടങ്ങിയ ധാതുലവണങ്ങള് സമൃദ്ധമാണ്.
രോഗപ്രതിരോധം: കുറഞ്ഞ ഗ്ലൈസെമിക് ഇന്ഡക്സ് ഉള്ളതിനാല് പ്രമേഹ നിയന്ത്രണത്തിന് ഏറ്റവും അനുയോജ്യമാണ്. ഹൃദയാരോഗ്യത്തിനും ദഹനവ്യവസ്ഥയ്ക്കും ഗുണകരമാണ്.
അതിനാല് തന്നെയാണ് ഐക്യരാഷ്ട്രസഭയും ലോകാരോഗ്യ വിദഗ്ധരും മില്ലറ്റുകളെ ഭാവിയിലെ സുസ്ഥിര ഭക്ഷ്യസംവിധാനത്തിന്റെ പ്രധാന ഘടകമായി കാണുന്നത്.
ജീവിതശൈലി രോഗങ്ങളും കേരളവും
ഒരുകാലത്ത് മികച്ച ആരോഗ്യ സൂചികകളുടെ പേരില് ലോകശ്രദ്ധ നേടിയ കേരളം ഇന്ന് വലിയൊരു വെല്ലുവിളി നേരിടുകയാണ്. പ്രമേഹം, രക്തസമ്മര്ദ്ദം, അമിതവണ്ണം, ഹൃദ്രോഗങ്ങള്, ഫാറ്റി ലിവര് തുടങ്ങിയ ജീവിതശൈലി രോഗങ്ങളുടെ വ്യാപനം കേരളത്തില് ഭയപ്പെടുത്തുംവിധം വര്ധിച്ചിരിക്കുന്നു.
പോളിഷ് ചെയ്ത അരിയുടെ അമിത ഉപയോഗം, ശാരീരിക അധ്വാനക്കുറവ്, ഫാസ്റ്റ് ഫുഡ് സംസ്കാരം എന്നിവയാണ് ഇതിന് കാരണം. കേരളത്തിലെ പല കുടുംബങ്ങളിലും ഇന്ന് മരുന്നുകള് ഭക്ഷണത്തിന്റെ ഭാഗമായിത്തീര്ന്നിരിക്കുന്നു. ചികിത്സാചെലവ് വര്ധിക്കുകയും ആരോഗ്യപ്രശ്നങ്ങള് ചെറുപ്പക്കാരിലേക്ക് പോലും വ്യാപിക്കുകയും ചെയ്യുന്ന ഈ സാഹചര്യത്തില് മില്ലറ്റുകളുടെ തിരിച്ചുവരവ് ഒരു കാര്ഷിക പ്രസ്ഥാനം മാത്രമല്ല, മറിച്ച് ഒരു പൊതുജനാരോഗ്യ പ്രസ്ഥാനമാണ്.
സ്ത്രീ കര്ഷകരും മില്ലറ്റ് ഭാവിയും
2026-നെ ‘അന്താരാഷ്ട്ര വനിതാ കര്ഷക വര്ഷം’ ആയി ആഗോളതലത്തില് ആചരിക്കുമ്പോള് ഈ സന്ദേശത്തിന് പ്രാധാന്യമേറുന്നു. ഭാരതത്തിലും കേരളത്തിലും നൂറ്റാണ്ടുകളായി മില്ലറ്റ് വിത്തുകളുടെ സംരക്ഷകരും പരമ്പരാഗത കാര്ഷിക അറിവുകളുടെ കൈമാറ്റക്കാരുമായി നിലകൊണ്ടത് സ്ത്രീകളായിരുന്നു. അതിനാല് സ്ത്രീ കര്ഷകരുടെ നേതൃത്വത്തിലുള്ള മില്ലറ്റ് പ്രസ്ഥാനങ്ങള് ഗ്രാമീണ സമ്പദ് വ്യവസ്ഥയെയും കുടുംബാരോഗ്യത്തെയും ഒരുപോലെ ശക്തിപ്പെടുത്തും.
മില്ലറ്റുകളുടെ ചരിത്രം ഒരു ധാന്യത്തിന്റെ ചരിത്രമല്ല; അത് മനുഷ്യന്റെ അതിജീവനത്തിന്റെ ചരിത്രമാണ്. സിന്ധു നദീതട സംസ്കാരത്തില് മനുഷ്യനെ പോഷിപ്പിച്ച ഈ ധാന്യങ്ങള് ഇന്ന് ഐക്യരാഷ്ട്രസഭയുടെ വേദിയില് ലോകത്തിന്റെ ഭാവി ഭക്ഷണമായി അംഗീകരിക്കപ്പെട്ടിരിക്കുന്നു.
ജീവിതശൈലി രോഗങ്ങളുടെ വര്ധനവില് ആശങ്കപ്പെടുന്ന കേരളത്തിന് ഈ സന്ദേശം വളരെ പ്രസക്തമാണ്. മില്ലറ്റുകള് നമ്മുടെ പാരമ്പര്യമാണ്, നമ്മുടെ ആരോഗ്യമാണ്, നമ്മുടെ കര്ഷകരുടെ പ്രതീക്ഷയാണ്, നമ്മുടെ മക്കളുടെ ഭാവിയാണ്.
ജന്മഭൂമി ഓണ്ലൈന്