അമരവിള: പാറശ്ശാല എംഎല്‍എയുടെ അഭിമാന പദ്ധതിയായി തുടങ്ങി പണി ഇഴഞ്ഞുനീങ്ങുന്ന അമരവിള കാരക്കോണം ഹൈവേയില്‍ അപകടത്തില്‍ യുവാവിന് ദാരുണാന്ത്യം. അമരവിള കാരക്കോണം റോഡില്‍ ധനുവച്ചപുരം നെടിയാംകോടില്‍ സുഹൃത്തിന്റെ ബൈക്കിലിരുന്ന് യാത്ര ചെയ്യവേ റോഡില്‍ തെറിച്ചുവീണാണ് യുവാവിന് ദാരുണാന്ത്യം സംഭവിച്ചത്. കുന്നത്തുകാല്‍ നാറാണി മണ്ണംകോട് അജികുമാര്‍ സതി ദമ്പതികളുടെ മകന്‍ അച്ചു (23) ആണ് മരണപ്പെട്ടത്.
കാരക്കോണത്തു നിന്നും അമരവിള ഭാഗത്തേക്ക് സുഹൃത്തിന്റെ ബൈക്കില്‍ പുറകിലിരുന്ന് യാത്ര പോകവേ ബൈക്ക് റോഡിലെ കുഴിയില്‍ വീണ് പുറകിലിരുന്ന അച്ചു റോഡില്‍ തെറിച്ചു വീഴുകയായിരുന്നു. ഉടനെ നെയ്യാറ്റിന്‍കര ജനറല്‍ ആശുപത്രിയില്‍ എത്തിച്ചെയെങ്കിലും ജീവന്‍ രക്ഷിക്കാനായില്ല.
അമരവിള കാരക്കോണം റോഡ് പണി തുടങ്ങിയിട്ട് മാസങ്ങള്‍ പിന്നിട്ടു. റോഡുവക്കിലെ അഗാധ കുഴികള്‍ അപകടങ്ങള്‍ പതിവാക്കിയിട്ടും അധികൃതര്‍ സുരക്ഷ ഒരുക്കാത്തതില്‍ നാട്ടുകാര്‍ നേരത്തെ തന്നെ പരാതി ഉയര്‍ത്തിയിരുന്നു. അശാസ്ത്രീയ റോഡ് നിര്‍മാണവും സുരക്ഷിതമല്ലാത്ത സംവിധാനങ്ങളും കാരണം അപകടം പതിയിരിക്കുന്ന റോഡായി മാറിയിട്ടും അധികൃതര്‍ കാണിച്ച അലംഭാവമാണ് അച്ചുവിന്റെ മരണത്തിനിട വരുത്തിയത്. അച്ചുവിന്റെ മൃതദേഹം നെയ്യാറ്റിന്‍കര ജനറല്‍ ആശുപത്രി മോര്‍ച്ചറിയില്‍. സഹോദരന്‍ അഖില്‍.
