വയനാട് : മുണ്ടക്കൈ ദുരന്തത്തിന്റെ പശ്ചാത്തലത്തില് ഭക്ഷണ വിതരണത്തിനായി ചിലര് പണപ്പിരിവ് നടത്തുന്നതായി ശ്രദ്ധയില്പ്പെട്ടിട്ടുണ്ടെന്ന് മന്ത്രി പി എ മുഹമ്മദ് റിയാസ്. ദുരന്ത ടൂറിസമായി ഇതിനെ കാണുന്നവരുണ്ട്. ഇതില് നിയന്ത്രണം കൊണ്ടുവരണമെന്നും മന്ത്രി പറഞ്ഞു.
‘കേരളത്തില് എല്ലാം ജനകീയമാണ്. വളരെ ആത്മാര്ത്ഥമായി പാചകം ചെയ്ത് ഭക്ഷണം വിതരണം ചെയ്യുന്നവരുണ്ട്. അവരെ ബഹുമാനിക്കുന്നു. അവര് ചെയ്തതൊന്നും ചെറുതായി ആരും കാണുന്നില്ല. എന്നാല്, ഭക്ഷണം കഴിച്ചിട്ട് ചില പ്രയാസങ്ങള് നേരിട്ടവരുണ്ട്. സൈനികര് ഉള്പ്പെടെ രക്ഷാപ്രവര്ത്തനത്തിലെ ആളുകള്ക്ക് അങ്ങനെ ആവുമ്പോള് ബുദ്ധിമുട്ടാണ്. ഭക്ഷണത്തിന്റെ ഗുണനിലവാരം ഉറപ്പുവരുത്തണം. ഭക്ഷണം നല്കുന്നതിന്റെ പേരില് വ്യാപകമായ പണപ്പിരിവ് നടത്തുന്നുണ്ടെന്ന ആക്ഷേപം ഉയരുന്നുണ്ട്. അതിലൊരു ശ്രദ്ധവേണം’, പി എ മുഹമ്മദ് റിയാസ് പറഞ്ഞു.
പ്രവര്ത്തനത്തിനായി ആവശ്യമുള്ള വോളണ്ടിയര്മാര് മതി. നല്ല നിലയില് പ്രവര്ത്തിക്കുന്നവരാണ് എല്ലാവരും . എന്നാല് ഇതൊന്നുമല്ലാതെ ചിലര് വരികയും വീഡിയോ എടുക്കുകയും ചെയ്യുന്നുണ്ട്. ചിലര് സ്ഥലം കാണാനായി വരുന്നു. ദുരന്ത ടൂറിസമായി ഇതിനെ കാണുന്നവരുണ്ട്. ഇതില് നിയന്ത്രണം കൊണ്ടുവരണമെന്നും മന്ത്രി പറഞ്ഞു.
