പത്തനംതിട്ട: കലഞ്ഞൂർ പാക്കണ്ടത്ത് വീണ്ടും പുലിയെ കണ്ടെന്ന് പ്രദേശവാസികൾ. കഴിഞ്ഞ ദിവസം വൈകിട്ട് പാറപ്പുറത്ത് വന്യജീവി നിൽക്കുന്നതിന്റെ ദൃശ്യങ്ങൾ പുറത്ത് വന്നിരുന്നു. പ്രദേശവാസികൾ തന്നെയാണ് ഇതിന്റെ ദൃശ്യങ്ങൾ പകർത്തിയത്.പ്രദേശത്ത് പുലിയിറങ്ങി എന്ന നിഗമനത്തിൽ വനംവകുപ്പും പരിശോധന ശക്തമാക്കി.
പാക്കണ്ടം രാക്ഷസൻപാറയിലാണ് പുലി നിൽക്കുന്നതിന്റെ ദൃശ്യങ്ങൾ കഴിഞ്ഞദിവസം പുറത്തുവന്നിരുന്നു. മേഖലയിലെ വളർത്തു മൃഗങ്ങളെ വന്യജീവി പിടിക്കുന്നത് നിത്യ സംഭവമായതോടെയാണ് പ്രദേശവാസികൾ തന്നെ അന്വേഷണം ആരംഭിച്ചത്. ഒടുവിൽ അവർ തന്നെ ദൃശ്യങ്ങൾ പകർത്തി വനംവകുപ്പിന് കൈമാറുകയായിരുന്നു.
പുലിയെ തന്നെയാണ് ജനവാസമേഖലയോട് ചേർന്നുള്ള പാറപ്പുറത്ത് കണ്ടതെന്ന് പ്രാഥമികമായി വനംവകുപ്പും സ്ഥിരീകരിച്ചു. എന്നാൽ കടുവയാണോ എന്ന സംശയം പ്രദേശവാസികളിൽ ഒരു വിഭാഗം പ്രകടിപ്പിക്കുന്നതിനാൽ മേഖലയിൽ ക്യാമറ സ്ഥാപിച്ച് വനംവകുപ്പ് നിരീക്ഷണം ശക്തമാക്കി.
