ആലപ്പുഴ : ലോക്സഭാ തെരഞ്ഞെടുപ്പില് ഏറ്റ തിരിച്ചടിക്ക് പിന്നാലെ എസ് എന് ഡി പി യോഗത്തിന് നേരെ വാളോങ്ങിയ സി പി എം സംസ്ഥാന സെക്രട്ടറി എം വി ഗോവിന്ദനെ വിമര്ശിച്ച് വെളളാപ്പളളി നടേശന്.
എം.വി. ഗോവിന്ദനു സംസ്ഥാന രാഷ്ട്രീയത്തിലെ യാഥാര്ഥ്യങ്ങള് അറിഞ്ഞു പ്രവര്ത്തിക്കാന് അറിയില്ലെന്ന് വെള്ളാപ്പള്ളി നടേശന് പറഞ്ഞു. ഗുരുനാരായണ ധര്മസമന്വയ ശിബിരവും ഗുരുപൂര്ണിമാഘോഷവും ചേര്ത്തലയില് ഉദ്ഘാടനം ചെയ്യുകയായിരുന്നു അദ്ദേഹം.
വള്ളം മുങ്ങാന് നേരത്ത് കിളവിയെ പിടിച്ചു വെള്ളത്തിലിട്ടു രക്ഷപെടാന് ശ്രമിക്കുന്ന ശൈലിയാണ് സിപിഎം ഇപ്പോള് സ്വീകരിക്കുന്നതെന്ന് പറഞ്ഞ വെളളാപ്പളളി,കോടിയേരി ബാലകൃഷ്ണന് പാര്ട്ടി സെക്രട്ടറിയായിരുന്നപ്പോള് എല്ലാ സമുദായങ്ങളെയും സമന്വയിപ്പിച്ചു കൊണ്ടുപോയ കാര്യം ചൂണ്ടിക്കാട്ടി.
എം.വി. ഗോവിന്ദന് സിപിഎം സംസ്ഥാന സെക്രട്ടറിയായ ശേഷമാണ് എസ്എന്ഡിപി യോഗത്തെയും ശ്രീനാരായണ പ്രസ്ഥാനങ്ങളെയും കടന്നാക്രമിക്കുന്നത്. എസ്എന്ഡിപി യോഗം എന്താണെന്ന് അറിയാത്ത ആളാണ് എം വി ഗോവിന്ദനെന്ന് വെളളാപ്പളളി പറഞ്ഞു.യോഗത്തിന്റെ ശൈലി എന്താണെന്നും പ്രവര്ത്തനം എന്താണെന്നും എം.വി. ഗോവിന്ദന് അറിയില്ല.
രാഷ്ട്രീയമായ വീതംവയ്പ്പില് ഈഴവാദി പിന്നാക്ക വിഭാഗങ്ങള് തഴയപ്പെട്ടു. ഈ സത്യം വിളിച്ചുപറയുന്നതിനാലാണ് തന്നെ ആക്രമിക്കാനുളള ശ്രമമെന്നും വെള്ളാപ്പള്ളി നടേശന് പറഞ്ഞു.
