ന്യൂദല്‍ഹി: വര്‍ദ്ധിച്ചുവരുന്ന ആശങ്കകള്‍ക്കിടയില്‍, ഐവിഎഫ് ക്ലിനിക്കുകളെയും അസിസ്റ്റഡ് റീപ്രൊഡക്റ്റീവ് ടെക്‌നോളജി (എആര്‍ടി) സെന്ററുകളെയും നിയന്ത്രിക്കുന്ന ചട്ടക്കൂടും നിയമങ്ങളും അവലോകനം ചെയ്യാനായി ദേശീയ വനിതാ കമ്മീഷന്‍ മുന്‍ ദല്‍ഹി ഹൈക്കോടതി ജഡ്ജി ആശാ മേനോന്റെ നേതൃത്വത്തില്‍ കമ്മിറ്റി രൂപീകരിച്ചു.
നൈതിക ചികിത്സാ രീതികള്‍, സ്റ്റാന്‍ഡേര്‍ഡ് ക്ലിനിക്കല്‍ പ്രോട്ടോക്കോള്‍, കൂടുതല്‍ സുതാര്യത എന്നിവ പ്രോത്സാഹിപ്പിക്കുന്നതിനായി എആര്‍ടി ക്ലിനിക്കുകള്‍ക്കും ഐവിഎഫ് സെന്ററുകള്‍ക്കുമായി സ്റ്റാന്‍ഡേര്‍ഡ് ഓപ്പറേറ്റിംഗ് നടപടിക്രമങ്ങളും മികച്ച രീതികളും കമ്മിറ്റി നിര്‍ദ്ദേശിക്കുമെന്ന് കമ്മീഷന്‍ പറഞ്ഞു.
ജുഡീഷ്യറി, മെഡിസിന്‍, ഫോറന്‍സിക് സയന്‍സ്, നിയമ നിര്‍വ്വഹണം, ഗൈനക്കോളജി, പബ്ലിക് പോളിസി, ആരോഗ്യ കുടുംബക്ഷേമ മന്ത്രാലയം എന്നിവയിലെ വിദഗ്ധരെ പാനലില്‍ ഉള്‍പ്പെടുത്തിയിട്ടുണ്ട്. 2021 ലെ അസിസ്റ്റഡ് റീപ്രൊഡക്റ്റീവ് ടെക്‌നോളജി (റെഗുലേഷന്‍) ആക്ട്, 2021 ലെ സറോഗസി (റെഗുലേഷന്‍) ആക്ട്, 2026 ല്‍ വിജ്ഞാപനം ചെയ്ത പ്രസക്തമായ ഭേദഗതി നിയമങ്ങള്‍ എന്നിവയുടെ നടപ്പാക്കല്‍ കമ്മിറ്റി അവലോകനം ചെയ്യും. അതേസമയം ഫെര്‍ട്ടിലിറ്റി ചികിത്സ തേടുന്ന സ്ത്രീകള്‍ ആ പ്രക്രിയയുടെ ഓരോ ഘട്ടത്തിലും സംരക്ഷിക്കപ്പെടുന്നുണ്ടെന്ന് ഉറപ്പാക്കുമെന്നും വനിതാ കമ്മിഷന്‍ അറിയിച്ചു.
