ഗാന്ധിനഗര് : ഗുജറാത്തില് ചന്ദിപുര വൈറസ് (സിഎച്ച്പിവി) ഏഴ് പേര്ക്ക് കൂടി സ്ഥിരീകരിച്ചു. സംസ്ഥാനത്ത് രോഗം സ്ഥിരീകരിച്ചവരുടെ എണ്ണം ഇതോടെ 58 ആയി. വൈറസ് ബാധിച്ച് ഇതുവരെ 20 പേരുടെ മരണം റിപ്പോര്ട്ട് ചെയ്തിട്ടുണ്ട്.
സബര്കാന്ത, ആരവല്ലി, പഞ്ച്മഹല്, മോര്ബി, വഡോദര ജില്ലകളില് ഓരോരുത്തര്ക്ക് രോഗം സ്ഥിരീകരിച്ചപ്പോള് മെഹ്സാനയില് രണ്ട് പേര്ക്കാണ് കഴിഞ്ഞദിവസം വൈറസ് ബാധ സ്ഥിരീകരിച്ചത്. ഈ മാസം ഒന്നിനാണ് ചന്ദിപുര വൈറസ് ഗുജറാത്തില് സ്ഥിരീകരിച്ചത്.
കുട്ടികളെയാണ് പ്രധാനമായും ഈ അസുഖം ബാധിക്കുന്നത്. അണുവാഹകരായ സാന്ഡ് ഫ്ലൈ കടിക്കുന്നതിലൂടെയാണ് വൈറസ് മനുഷ്യരിലേക്ക് പടരുന്നതെന്നാണ് കരുതുന്നത്. മഹാരാഷ്ട്രയിലെ ചന്ദിപുര ഗ്രാമത്തില് 1965ലാണ് ഈ വൈറസ് ആദ്യമായി കണ്ടെത്തിയത്
