കോഴിക്കോട്: താമരശ്ശേരിയില്‍ യുവാവിനെ തട്ടിക്കൊണ്ടുപോയെന്ന പരാതിയില്‍ വിപുലമായ അന്വേഷണത്തിന് പ്രത്യേക അന്വേഷണ സംഘം രൂപീകരിച്ചു. താമരശ്ശേരി ഡിവൈഎസ്പി പ്രമോദിന്റെ നേതൃത്വത്തിലുള്ള സംഘമാകും അന്വേഷിക്കുക.
അന്വേഷണ സംഘത്തില്‍ താമരശേരി, കാക്കൂര്‍, കൊടുവള്ളി, മുക്കം എന്നീ സ്റ്റേഷനുകളിലെ സിഐമാരും 11 പൊലീസുകാരും ഉള്‍പ്പെടുന്നു.
കുടുംബം പൊലീസിനെതിരെ പരാതിയുമായി രംഗത്തെത്തിയിരുന്നു.ഇതിന് പിന്നാലെയാണ് പൊലീസ് പ്രത്യേക അന്വേഷണ സംഘത്തെ നിയോഗിച്ചത്. മൂഴിക്കല്‍ സ്വദേശി ഹര്‍ഷാദിനെ കഴിഞ്ഞ വെള്ളിയാഴ്ചയാണ് തട്ടിക്കൊണ്ടുപോയത്.രണ്ട് ദിവസം കഴിഞ്ഞിട്ടും പരാതിയില്‍ നടപടിയെടുത്തില്ലെന്നാണ് ആരോപണം.
താമരശ്ശേരി പൊലീസ് സ്റ്റേഷന്‍ പരിധിയില്‍ നിന്നും തട്ടിക്കൊണ്ടുപോയ ഹര്‍ഷാദിനെ ഇനിയും കണ്ടെത്താന്‍ കഴിഞ്ഞിട്ടില്ല.തട്ടിക്കൊണ്ടുപോയ സംഘം 10 ലക്ഷം രൂപ മോചനദ്രവ്യം ആവശ്യപ്പെട്ടു.
മൊബൈല്‍ ഫോണ്‍ കട ഉടമയാണ് ഹര്‍ഷാദ്. സാമ്പത്തിക ഇടപാടിനെ തുടര്‍ന്നാണ് ഹര്‍ഷദിനെ തട്ടിക്കൊണ്ടുപോയതെന്നാണ് സൂചന. മുന്‍ഗ്ലാസ് തകര്‍ത്ത നിലയില്‍ ഇയാളുടെ കാര്‍ കണ്ടെത്തിയിരുന്നു. കാര്‍ പൊലീസ് സ്റ്റേഷനിലേക്ക് കൊണ്ടുപോയി.
ആരോ വിളിച്ചതിനെ തുടര്‍ന്നാണ് ഹര്‍ഷദ് വീട്ടില്‍ നിന്ന് പുറത്തേക്ക് പോയതെന്ന് ഭാര്യ പറയുന്നു. സാമ്പത്തിക ഇടപാടുകളൊന്നും ഉള്ളതായി അറിയില്ലെന്നും കുടുംബം വെളിപ്പെടുത്തി.
