ന്യൂദല്ഹി: പാരിസ് ഒളിംപിക്സ് ബാഡ്മിന്റണില് ഭാരത വനിതാ താരം പി.വി. സിന്ധു മത്സരിക്കുന്നത് പത്താം സീഡ് താരമായി. മലയാളി താരം എച്ച്.എസ്. പ്രണോയ് 13-ാം സീഡ് താരമായായിരിക്കും ഇറങ്ങുക. ലക്ഷ്യ സെന് സീഡില്ലാ താരമായാണ് മത്സരിക്കുക.
സിന്ധുവും പ്രണോയിയും താരതമ്യേന എളുപ്പുമുള്ള ഗ്രൂപ്പിലാണ് ഉള്പ്പെട്ടിരിക്കുന്നത്. അതേസമയം ലക്ഷ്യയ്ക്ക് തുടക്കം തന്നെ ഭയങ്കര കട്ടിയാണ്. പ്രീക്വാര്ട്ടര് മത്സരത്തില് ഒരു പക്ഷേ സിന്ധുവിന് ചൈനയുടെ ഹി ബിങ് ജിയാവോ എതിരാളിയായി വന്നേക്കും.
വനിതാ സിംഗിള്സില് മാത്രം 39 താരങ്ങളാണ് മത്സരിക്കുന്നത്. മൂന്ന് വീതം താരങ്ങളുള്ള 13 ഗ്രൂപ്പുകളാണ് പ്രാഥമിക റൗണ്ടിലുള്ളത്. സിംഗിള്സ് പോരാട്ടങ്ങളില് ഇത്രയേറെ താരങ്ങള് അണിനിരക്കുന്നതിനാല് ഇന്നലെ ഗ്രൂപ്പ് നിര്ണയത്തിനും ഒരുപാട് സമയമെടുത്തു. അതിനാല് ഡബിള്സ് മത്സരങ്ങളുടെ ഗ്രൂപ്പ് നിര്ണയം മാറ്റിവച്ചിരിക്കുകയാണ്. ലോക ബാഡ്മിന്റമിലെ സൂപ്പര് പുരുഷ സഖ്യമായ ഭാരതത്തിന്റെ സാത്വിക് സായിരാജ് റങ്കി റെഡ്ഡി-ചിരാഗ് ഷെട്ടി കൂട്ടുകെട്ടിന്റെ മത്സര വിവരങ്ങളറിയാന് ഇനിയും കാത്തിരിക്കണം.
