തിരുവനന്തപുരം: താന്‍ ഒരു സിനിമാ നിര്‍മ്മാണക്കമ്പനി ആരംഭിക്കുകയാണെന്ന വെളിപ്പെടുത്തലുമായി നടി മല്ലികാ സുകുമാരന്‍.. ദുബായിലാണ് കമ്പനി തുടങ്ങുന്നതെന്നും മല്ലികാ സുകുമാരന്‍ പ്രസ്താവിച്ചിരുന്നു.
ഒരു യുട്യൂബ് ചാനലിന് നല്‍കിയ അഭിമുഖത്തിലാണ് മല്ലികാസുകുമാരന്‍ ഇക്കാര്യം വെളിപ്പെടുത്തിയത്. നിര്‍മ്മാതാവ് ലിസ്റ്റിന്‍ ജോസഫും ചേര്‍ന്നുള്ള അഭിമുഖത്തിലായിരുന്നു മല്ലികാ സുകുമാരന്‍ തന്റെ സിനിമാനിര്‍മ്മാണ സംരംഭത്തെക്കുറിച്ച് പറഞ്ഞത്.
ലിസ്റ്റിന്‍ ജോസഫിന്റെ അവസാന പൃഥ്വിരാജ് ചിത്രത്തില്‍ മല്ലികാ സുകുമാരനും വേഷമിട്ടിരുന്നു. അത് നിര്‍മ്മിച്ചത് ലിസ്റ്റിന്‍ ജോസഫും പൃഥ്വിരാജും ചേർന്നായിരുന്നു. അൽഫോൺസ് പുത്രന്‍ സംവിധാനം ചെയ്ത ഗോൾഡ് എന്ന ചിത്രത്തിൽ മല്ലികാ സുകുമാരനും ഒരു വേഷം ചെയ്തിട്ടുണ്ട്.
പുതിയ നിര്‍മ്മാണക്കമ്പനി തുടങ്ങാനുള്ള കാരണം ഈ അഭിമുഖത്തില്‍ അല്‍പം നര്‍മ്മരൂപത്തിലാണ് മല്ലികാ സുകുമാരന്‍ അവതരിപ്പിച്ചത്. ”ഗോൾഡിനു ശേഷം എന്നെ ലിസ്റ്റിൻ വിളിച്ചിട്ടില്ല. അതിനു ശേഷം ഒരുപാട് സിനിമകൾ ചെയ്തു. അതുകൊണ്ട് ഞാൻ പുതിയ നിർമ്മാണ കമ്പനി ദുബായിൽ തുടങ്ങാൻ പോവുകയാണ്.” ലിസ്റ്റിനെ പരിഹസിച്ചുകൊണ്ട് മല്ലികാ സുകുമാരന്‍ പറഞ്ഞു.
ഗോള്‍ഡിന് ശേഷം പല സിനിമകളും ലിസ്റ്റിന്‍ ജോസഫ് ചെയ്തെങ്കിലും തന്നെ വിളിച്ചില്ലെന്ന് മല്ലികാ സുകുമാരന്‍ പരിഭവമായി പറഞ്ഞു. അതുകൊണ്ടാണ് നിര്‍മ്മാണക്കമ്പനി തുടങ്ങുന്നതെന്നും മല്ലികാ സുകുമാരന്‍ പാതി തമാശയായി പറഞ്ഞു.
മല്ലികാസുകുമാരന്‍ തമാശയാണോ കാര്യമാണോ പറഞ്ഞത് എന്നറിയാതെ കുഴങ്ങുകയാണ് സിനിമാ രംഗത്തുള്ളവര്‍. മകന്‍ പൃഥ്വിരാജും സിനിമാ നിര്‍മ്മാണരംഗത്തേക്ക് കടന്നതിനാല്‍ സ്വന്തമായി ഒരു നിര്‍മ്മാണക്കമ്പനി എന്ന മല്ലികാ സുകുമാരന്റെ സ്വപ്നം എത്തിപ്പിടിക്കാന്‍ കഴിയാത്ത സ്വപ്നമല്ല. പക്ഷെ പാതി തമാശയും പാതി കാര്യവുമായി പറഞ്ഞതിനാല്‍ സ്ഥിരീകരിക്കാന്‍ കഴിയുകയും ചെയ്യാതെ കുഴങ്ങുകയാണ് സിനിമക്കാര്‍. ഈയിടെയാണ് മല്ലികാ സുകുമാരന്‍ സിനിമാലോകത്ത് എത്തിയതിന്റെ 50ാം വാര്‍ഷികം ആഘോഷിച്ചത്.
