ന്യൂദല്‍ഹി: ബംഗാളിലെ കോണ്‍ഗ്രസ് എംപി മഹുവ മൊയ്ത്ര ദേശീയ വനിതാകമ്മീഷന്‍ അധ്യക്ഷയെ അപമാനിച്ചുകൊണ്ട് എക്സില്‍ ഇട്ട പോസ്റ്റ് തേടി ദല്‍ഹി പൊലീസ്. വിവാദത്തെ തുടര്‍ന്ന് മഹുവ മൊയ്ത്ര ഈ പോസ്റ്റ് പിന്‍വലിച്ചിരുന്നു. ഈ കേസില്‍ തെളിവിനായി ഈ പോസ്റ്റ് തിരിച്ചെടുത്ത് തരണമെന്ന് ദല്‍ഹി പൊലീസ് എക്സ് അധികൃതരോട് ആവശ്യപ്പെട്ടിരിക്കുകയാണ്.
സമൂഹമാധ്യമപ്ലാറ്റ് ഫോമായ എക്സിലാണ് ദേശീയ വനിതാകമ്മീഷന്‍ അധ്യക്ഷ രേഖ ശര്‍മ്മയ്‌ക്കെതിരെ മഹുവ മൊയ്ത്ര അശ്ലീല സന്ദേശം പങ്കുവെച്ചത്. ഇതിന് മഹുവ മൊയ്ത്രയ്‌ക്കെതിരെ കേസെടുത്തു. പുതിയ ക്രിമിനല്‍ നിയമമനുസരിച്ചാണ് ദല്‍ഹി പൊലീസ് കേസെടുത്തത്.
രേഖാശര്‍മ്മ നല്‍കിയ പരാതിപ്രകാരം ദല്‍ഹി പൊലീസിലെ സ്പെഷ്യല്‍ സെല്‍ ആണ് കേസെടുത്തത്. പുതിയ ക്രിമിനല്‍ നിയമമായ ഭാരതീയ ന്യായ സംഹിതയിലെ 79ാം വകുപ്പ് പ്രകാരമാണ് കേസ്. സ്ത്രീയുടെ ആത്മാഭിമാനത്തെ വാക്കുകൊണ്ടോ, ആംഗ്യംകൊണ്ടോ മുറിവേല്‍പിക്കുന്നതിനെതിരെയാണ് ഈ വകുപ്പ്.
ഹാഥ് റസിലെ ഭോലെ ബാബയുടെ സത്സംഗിനിടയില്‍ മരിച്ച സ്ത്രീകളുടെ ബന്ധുക്കളെ കാണുന്ന ദേശീയ വനിതാ കമ്മീഷന്‍ അധ്യക്ഷ രേഖാ ശര്‍മ്മയുടെ വീഡിയോ പങ്കുവെച്ചുകൊണ്ടാണ് മഹുവ മൊയ്ത്ര അശ്ലീല കമന്‍റിട്ടത്. ഹാഥ് റസ് സന്ദര്‍ശിക്കുന്ന രേഖാ ശര്‍മ്മയ്‌ക്ക് ഒരാള്‍ പിന്നില്‍ നിന്നും കുടപിടിച്ചു കൊടുക്കുന്ന വീഡിയോയെ വിമര്‍ശിച്ചുകൊണ്ടായിരുന്നു മഹുവ മൊയ്ത്ര പ്രകോപനപരമായ പരാമര്‍ശം നടത്തിയത്. സ്വന്തം കുട പിടിക്കാന്‍ രേഖാ ശര്‍മ്മയ്‌ക്ക് കഴിയില്ലേ എന്ന് ചോദിച്ച മുഹവ മൊയ്ത്രയുടെ അടുത്ത വരിയാണ് കൂടുതല്‍ വിവാദമായത്. ഒരു പക്ഷെ രേഖാ ശര്‍മ്മ തന്റെ യജമാനന്റെ പൈജാമ പിടിക്കുന്ന തിരക്കിലായിരിക്കാം. അതിനാലാണ് മറ്റൊരാള്‍ കുട പിടിച്ചുകൊടുക്കുന്നത് എന്ന രീതിയിലുള്ള അശ്ലീലകമന്‍റായിരുന്നു മഹുവ മൊയ്ത്രയുടേത്.
ഈ കമന്‍റിന്റെ പേരില്‍ ഉടന്‍ കേസെടുക്കണമെന്ന് വെള്ളിയാഴ്ച തന്നെ രേഖാ ശര്‍മ്മ ആവശ്യപ്പെട്ടിരുന്നു. അപ്പോഴെല്ലാം രേഖാ ശര്‍മ്മയോട് കൊമ്പുകോര്‍ക്കുന്ന നിലപാടാണ് മഹുവ മൊയ്ത്ര എടുത്തത്. എന്നാല്‍ പ്രതിഷേധം വ്യാപകമായതോടെ അവര്‍ പ്രതിരോധത്തിലായി.
പാര്‍ലമെന്‍റില്‍ അദാനിയ്‌ക്കെതിരെ ചോദ്യങ്ങള്‍ ചോദിക്കുന്നതിന് കൈക്കൂലി വാങ്ങിയ എംപിയാണ് മഹുവ മൊയ്ത്ര. അന്ന് മഹുവയ്‌ക്കെതിരെ കേസ് നല്‍കിയ അഭിഭാഷകന്‍ ദേഹാദ്രായ് പരാതി പിന്‍വലിച്ചതോടെ തല്‍ക്കാലം മഹുവ രക്ഷപ്പെടുകയും വീണ്ടും ബംഗാളില്‍ കൃഷ്ണനഗറില്‍ നിന്നും എംപിയായി ജയിച്ച് വീണ്ടും പാര്‍ലമെന്‍റില്‍ എത്തിയിരിക്കുകയാണ്.
പ്രതികരിക്കാൻ ഇവിടെ എഴുതുക: