ശ്രീനഗര്: രാജ്യത്തെ ഏറ്റവും മികച്ച ആരോഗ്യ കേന്ദ്രമാണ് ജമ്മുവില് ഉയരുന്നതെന്ന് കേന്ദ്ര ആരോഗ്യമന്ത്രി ജെ.പി. നദ്ദ. ഇന്നലെ ജമ്മുവിലെ എയിംസ് സന്ദര്ശിക്കവേയാണ് മന്ത്രിയുടെ ഈ പ്രസ്താവന. കേന്ദ്രമന്ത്രി ജിതേന്ദ്ര സിങ്, ജമ്മു കശ്മീര് ബിജെപി പ്രസിഡന്റ് രവീന്ദര് റെയ്ന എന്നിവരും നദ്ദയ്ക്കൊപ്പമുണ്ടായിരുന്നു.
പ്രധാനമന്ത്രി നരേന്ദ്രമോദി ഫെബ്രുവരിയില് ഉദ്ഘാടനം ചെയതതാണ് എയിംസ്. അതിനു പിന്നാലെ ഇവിടെ ക്ലാസുകളും ആരംഭിച്ചു. മികച്ച സൗകര്യങ്ങളാണ് ജമ്മു എയിംസില് നല്കിയിട്ടുള്ളത്. അന്താരാഷ്ട്ര നിലവാരത്തിലുള്ള ഉപകരണങ്ങളും സാങ്കേതിക വിദ്യയുമാണ് ഇവിടെ ഉപയോഗിച്ചിട്ടുള്ളത്.
ഔട്ട് പേഷ്യന് വിഭാഗം അടുത്തുതന്നെ ആരംഭിക്കും. ഇനിയും സൗകര്യങ്ങള് ഒരുക്കാനും വിദഗ്ധരായ ഫാക്കല്റ്റികളെ നിയമിച്ച് പ്രവര്ത്തനം വിപുലമാക്കാനുള്ള ശ്രമത്തിലാണ് കേന്ദ്ര സര്ക്കാര്. കൂടുതല് ജീവനക്കാരെ നിയമിക്കാനുള്ള നടപടികള് തുടരുകയാണ്.
സംസ്ഥാനത്തു നിന്നും വിദഗ്ധ ചികിത്സയ്ക്കായി പിജിഐഎംഇആര് ചണ്ഡീഗഢ്, ദല്ഹി എന്നിവിടങ്ങളിലേക്ക് പോകുന്നവര്ക്ക് ജമ്മു എയിംസ് ആശ്വാസമാണ്. ലോകോത്തര മെഡിക്കല് സൗകര്യങ്ങള് ജമ്മു എയിംസില് കാണാന് സാധിച്ചത് സന്തോഷകരമാണെന്നും നദ്ദ പറഞ്ഞു.
കശ്മീര് താഴ്വരയില് അടിക്കടിയുള്ള ബന്ദുകളും പണിമുടക്കുകളും പ്രക്ഷോഭങ്ങളും പഴങ്കഥയായെന്ന് നദ്ദ പറഞ്ഞു. ജമ്മു വികസിക്കുകയാണ്. ആര്ട്ടിക്കിള് 370 റദ്ദാക്കിയതിന് പിന്നാലെ രണ്ട് കോടി പേരാണ് കഴിഞ്ഞ വര്ഷം ജമ്മു കശ്മീര് സന്ദര്ശിച്ചത്. മുമ്പ് അതിര്ത്തിക്കപ്പുറത്തേക്ക് പ്രതിരോധിക്കാനും തിരിച്ച് വെടിവയ്ക്കാനുമായി സൈന്യത്തിന് പ്രത്യേക അനുമതി ആവശ്യമായിരുന്നു. എന്നാല് ഇന്ന് സ്ഥിതിഗതികള് മാറി. സൈന്യത്തിന് സ്വാതന്ത്ര്യം നല്കി.
ജമ്മു കശ്മീരിലെ ജനങ്ങള് ഇന്ന് സമാധാന പരമായ ജീവിതമാണ് നയിക്കുന്നത്. ഇതാണ് മോദിയുടെ നേതൃത്വത്തിലുള്ള പുതിയ ഭാരതമെന്നും നദ്ദ കൂട്ടിച്ചേര്ത്തു. സന്ദര്ശന വേളയില് ബിജെപി ജമ്മു കശ്മീര് നിര്വാഹക സമിതി യോഗത്തെയും നദ്ദ അഭിസംബോധന ചെയ്തു. ജമ്മു രഘുനാഥ് ക്ഷേത്രവും സന്ദര്ശിച്ചു.
