കോഴിക്കോട്/ചേളന്നൂര്: കേന്ദ്രമന്ത്രി സുരേഷ് ഗോപി ജില്ലയിലെ ചേളന്നൂര്, കാക്കൂര്, നന്മണ്ട മേഖലയിലെ ദശാവതാര ക്ഷേത്രങ്ങള് സന്ദര്ശിച്ചു. ക്ഷേത്രസന്ദര്ശനം ടൂറിസം പദ്ധതിയുടെ ഭാഗമാണെന്നും നാലമ്പല ദര്ശനം പോലെ ദശാവതാരക്ഷേത്ര ദര്ശനവും ടൂറിസം പദ്ധതിയിലൂടെ സാധ്യമാക്കുമെന്നും അദ്ദഹം പറഞ്ഞു.
ദശാവതാര ദര്ശനം കേരളത്തില് നിലവിലില്ല. ഭാരതത്തില് തന്നെ അത്തരം ഒരു പദ്ധതി ഉണ്ടോയെന്നത് അന്വേഷിക്കേണ്ടി വരും. പത്തമ്പല ദര്ശനമാണ് പറഞ്ഞതെങ്കിലും കല്ക്കിയുടെ കാര്യം വ്യക്തല്ലാത്തതിനാല് നിലവില് ഒന്പത് അമ്പലങ്ങള് സന്ദര്ശിച്ചുവെന്നും അദ്ദേഹം പറഞ്ഞു.
ഇന്നലെ രാവിലെ 6 മണിയോടെ പെരുമീന്പുറം ശ്രീമഹാവിഷ്ണു ക്ഷേത്രത്തില് എത്തിയ സുരേഷ് ഗോപിയെ തന്ത്രി മേല്പ്പള്ളി മന ഉണ്ണികൃഷ്ണന് അടിതിരിപ്പാട്, ക്ഷേത്രം ഭാരവാഹികളായ പ്രസിഡന്റ് അശോകന്, പി.വാസുദേവന് നമ്പൂതിരി, കെ.വി. ശിവാനന്ദന്, കെ.പി. ദാമോദരന് എന്നിവര് പൂര്ണ കുംഭം നല്കി സ്വീകരിച്ചു. തുടര്ന്ന് ക്ഷേത്ര ദര്ശനം കഴിഞ്ഞെത്തിയ കേന്ദ്രമന്ത്രിക്ക് ദശാവതാര ക്ഷേത്ര ഏകോപന സമിതി പ്രസിഡന്റ് ഉദയവിഹാരി ഉപഹാരം നല്കി. ദശവതാര ക്ഷേത്ര വീഡിയോ കണ്ട ശേഷം പരശുരാമ ക്ഷേത്രത്തിലെത്തിയ അദ്ദേഹത്തെ പ്രസിഡന്റ് പ്രേമരാജന്, സെക്രട്ടറി സുധീഷ് മരുതാട്, മഹിളാ സമിതി അംഗങ്ങള് എന്നിവര് പൊന്നാടയണിയിച്ച് ആദരിച്ചു.
ബലരാമക്ഷേത്രത്തില് പ്രസിഡന്റ് വിശ്വനാഥന്റെ നേതൃത്വത്തില് പൂര്ണകുംഭം നല്കി സ്വീകരിച്ചു. ഇന്താട് ശ്രീകൃഷ്ണ ക്ഷേത്രം, തൃക്കോയിക്കല് നരസിംഹ ക്ഷേത്രം, രാമല്ലൂര് ശ്രീരാമസ്വാമി ക്ഷേത്രം, പന്ന്യം പള്ളി വരാഹക്ഷേത്രം, ആമമംഗലം ശ്രീവിഷ്ണു ക്ഷേത്രം, തീര്ത്ഥങ്കര വാമന ക്ഷേത്രം എന്നീ ക്ഷേത്രങ്ങളിലും ദര്ശനം നടത്തിയശേഷം 9.30ന് മടങ്ങി. എല്ലാ ക്ഷേത്രങ്ങളിലും സുരേഷ് ഗോപിയെ കാണാനും നിവേദനങ്ങള് നല്കാനും കേന്ദ്ര ടൂറിസം പദ്ധതിയില് വിവിധ പദ്ധതികള് ഉള്പ്പെടുത്തുന്നതിനും, രോഗികളും വീടില്ലാത്തവരും അങ്കണവാടി ജീവനക്കാരുമടക്കം നിരവധി പേര് എത്തി.
പിന്നീട് എഴുത്തുകാരന് എം.ടി. വാസുദേവന് നായരെ സന്ദര്ശിച്ചു. എംടി സുരേഷ് ഗോപിയുടെ കേന്ദ്രമന്ത്രി ലബ്ധിയില് ആശംസിച്ചു. ബിജെപി ജില്ലാ സമിതി ചിന്മയാ മിഷന് ഓഡിറ്റോറിയത്തില് സംഘടിപ്പിച്ച ശ്യാമപ്രസാദ് മുഖര്ജി അനുസ്മരണത്തിലും സില്വര് ഹില്സ് ഹയര്സെക്കന്ഡറി സ്കൂളില് ഭാരത് പെട്രോളിയം കോര്പറേഷന് സംഘടിപ്പിച്ച സ്വച്ഛതാ മിഷന് ക്യാമ്പയിനിലും പങ്കെടുത്തു.
