കായംകുളം: എഴുപത്താറുവയസുകാരിയെ പീഡിപ്പിച്ച യുവാവിനെ കായംകുളം പോലീസ് അറസ്റ്റു ചെയ്തു. കായംകുളം കൃഷ്ണപുരം സ്വദേശിനിയായ വയോധികയെ 27ന് എട്ടു മണിയോടെ വീട്ടില്‍ അതിക്രമിച്ചു കയറി ക്രൂരമായി ബലാത്സംഗം ചെയ്ത കേസില്‍ കരുനാഗപ്പള്ളി, ക്ലാപ്പന, പ്രയാര്‍തെക്ക് ചാലായില്‍ പടീറ്റതില്‍ ഷഹാസ് (27)നെയാണ് അറസ്റ്റു ചെയ്തത്.
ഒറ്റക്ക് താമസിക്കുന്ന വയോധികയുടെ വീടിന് സമീപത്ത് ഒളിച്ചിരുന്ന പ്രതി വയോധിക വീടിന്റെ വാതില്‍ തുറന്ന സമയം ഓടി അകത്ത് കയറിയാണ് കൃത്യം നടത്തിയത്. സംഭവ സമയത്ത് പ്രതി മദ്യ ലഹരിയിലായിരുന്നുവെന്ന് പോലീസ് പറഞ്ഞു. ഗുരുതരമായി പരിക്കേറ്റ വയോധിക വണ്ടാനം മെഡിക്കല്‍ കോളജ് ആശുപതിയില്‍ തീവ്രപരിചരണ വിഭാഗത്തില്‍ ചികിത്സയിലാണ്.
ആശുപത്രി അധികൃതര്‍ വിവരം അറിയിച്ചതിനെ തുടര്‍ന്നാണ് പോലീസ് ഇവരുടെ മൊഴിയെടുത്ത് കേസെടുത്തത്. കഞ്ചാവിന് അടിമയായ പ്രതി 20വയസുള്ളപ്പോള്‍ ഒന്നര കിലോ കഞ്ചാവുമായി കരുനാഗപ്പള്ളി എക്സൈസിന്റെ പിടിയിലാവുകയും, നാല് വര്‍ഷം ജയില്‍ ശിക്ഷ അനുഭവിക്കുകയും ചെയ്തിരുന്നു. കൃഷ്ണപുരം അതിര്‍ത്തി ചിറക്കടുത്ത് ഒളിച്ചിരുന്ന പ്രതിയെ സിസിടിവി കേന്ദ്രീകരിച്ച് നടത്തിയ അന്വേഷണത്തില്‍് പോലീസ് കണ്ടെത്തുകയായിരുന്നു. പ്രതിയെ സ്ഥലത്തെത്തിച്ച് കൂടുതല്‍ തെളിവെടുപ്പുകളും മറ്റും നടത്തുമെന്ന് കായംകുളം പോലീസ് അറിയിച്ചു.
