കണ്ണൂര്: കണ്ണൂരിലെ മുന് ഡിവൈഎഫ്ഐ നേതാവ് മനു തോമസ് സിപിഎം സംസ്ഥാന സെക്രട്ടറി എം.വി. ഗോവിന്ദന് നല്കിയ പരാതി പുറത്ത്. 2023 ഏപ്രിലിലാണ് മനു തോമസ് സംസ്ഥാന സെക്രട്ടറിക്ക് പരാതി നല്കിയത്. യുവജന കമ്മീഷന് ചെയര്മാന് എം. ഷാജര് സ്വര്ണക്കടത്ത് ക്വട്ടേഷന് സംഘവുമായി ചേര്ന്ന് തനിക്കെതിരെ ഗൂഢാലോചന നടത്തിയെന്നാണ് മനു തോമസിന്റെ പരാതിയില് പറയുന്നത്. തെളിവായി ശബ്ദരേഖയും ജില്ലാ കമ്മിറ്റിക്ക് ലഭിച്ചതായി മനു തോമസ് പരാതിയില് പറയുന്നുണ്ട്.
ആകാശ് തില്ലങ്കേരിയുടെ വാട്സ്ആപ്പ് ഗ്രൂപ്പിലാണ് ശബ്ദരേഖ വന്നത്. പരാതിയെക്കുറിച്ച് മൂന്ന് തവണ ജില്ലാ കമ്മിറ്റിയില് ഉന്നയിച്ചു. എന്നാല് ഇതേക്കുറിച്ച് അന്വേഷിക്കാന് ഒരു കൊല്ലത്തോളം ജില്ലാ കമ്മിറ്റി തയാറായില്ലെന്നും പരാതിയില് ആരോപിക്കുന്നു. ഷാജറിന് ശ്രദ്ധക്കുറവ് ഉണ്ടായി എന്ന പരാമര്ശം മാത്രമാണ് അന്വേഷണ കമ്മീഷന് നടത്തിയതെന്നും മനു തോമസ് പരാതിയില് ചൂണ്ടിക്കാണിക്കുന്നു.
കണ്ണൂരിലെ പാർട്ടിയിൽ പിടിമുറുക്കാൻ ശ്രമിച്ച ക്വട്ടേഷൻ സംഘങ്ങളോട് എതിരിട്ട മനു തോമസിനെ ജില്ലാ കമ്മിറ്റിയിൽ നിന്ന് സിപിഎം ഒഴിവാക്കിയിരുന്നു. ക്രിമിനൽ സംഘവുമായി പാർട്ടി നേതാക്കൾക്കുള്ള ബന്ധം തുറന്നുകാട്ടി പരാതി നൽകിയ മനു അതിന് ശേഷമാണ് പിന്നോട്ടായത്. അംഗത്വം പുതുക്കാതിരുന്നതോടെ പദവികളിൽ നിന്നൊഴിവായി.
