കോട്ടയം: ലോക്‌സഭാ തെരഞ്ഞെടുപ്പില്‍ കോട്ടയത്തുണ്ടായ തോല്‍വി ജോസ് കെ. മാണിക്കും, കേരളാ കോണ്‍ഗ്രസ് എമ്മിനും ഉണ്ടാക്കിയ ആഘാതത്തില്‍ നിന്നും നേതൃത്വം ഇനിയും മോചിതമായിട്ടില്ല. പൊതുതെരഞ്ഞെടുപ്പില്‍ കേരള കോണ്‍ഗ്രസുകള്‍ നേരിട്ട് ഏറ്റുമുട്ടുന്നത് 44 വര്‍ഷത്തിന് ശേഷമാണ്. കേരള കോണ്‍ഗ്രസ് രൂപീകരിച്ചതിന്റെ അറുപതാം വാര്‍ഷികത്തിലാണിതെന്ന് യാദൃച്ഛികം.
കോട്ടയത്ത് ജോസ് കെ. മാണിയുടെ നേതൃത്വത്തിലുള്ള കേരളാ കോണ്‍ഗ്രസിന് സംഭവിച്ച തോല്‍വി വലിയ രാഷ്‌ട്രീയ നഷ്ടമാണ് അവര്‍ക്കും എല്‍ഡിഎഫിനും ഉണ്ടാക്കിയിരിക്കുന്നത്. തോല്‍വിയോടെ ഇടതുമുന്നണിയില്‍ വിലപേശലിനുള്ള ശേഷിയും നഷ്ടമായി. ഇനിയെന്ത് എന്ന ചോദ്യമാണ് കേരളാ കോണ്‍ഗ്രസ് എമ്മിന് മുമ്പില്‍ ഉയരുന്നത്. ലോക്‌സഭയിലെ പ്രാതിനിധ്യം നഷ്ടപ്പെട്ടു, ജോസ് കെ. മാണിയുടെ രാജ്യസഭാ കാലാവധിയും ഈ മാസത്തോടെ കഴിയും. 2021ലെ നിയമസഭാ തെരഞ്ഞെടുപ്പിന് തൊട്ടുമുമ്പാണ് ജോസ് കെ. മാണിയും കൂട്ടരും എല്‍ഡിഎഫിലേക്ക് കൂടുമാറിയത്. ജോസിന്റെ വരവോടെ എല്‍ഡിഎഫിന് കോട്ടയം, പത്തനംതിട്ട, ഇടുക്കി ജില്ലകളില്‍ മുന്നേറ്റം കൈവരിക്കാന്‍ കഴിഞ്ഞിരുന്നു. പക്ഷെ, 52 വര്‍ഷം കെ.എം. മാണി കൈവശം വെച്ചിരുന്ന പാലായില്‍ മകന്‍ ജോസ് കെ. മാണി പരാജയപ്പെട്ടത് വിജയത്തിന്റെ എല്ലാ ശോഭയും കെടുത്തി. യുഡിഎഫിലൂടെ നേടിയ തോമസ് ചാഴിക്കാടന്റെ കോട്ടയം ലോക്‌സഭാ അംഗത്വവും പിന്നീട് ജോസ് കെ. മാണിക്ക് ലഭിച്ച രാജ്യസഭാംഗത്വവുമായിരുന്നു ഏക ആശ്വാസം.
കഴിഞ്ഞ തവണ യുഡിഎഫിലൂടെ എംപിയായ തോമസ് ചാഴികാടനെ തന്നെയാണ് ഇത്തവണ ഇടതുമുന്നണിയുടെ സ്ഥാനാര്‍ത്ഥിയായി കോട്ടയത്ത് മത്സരത്തിനിറക്കിയത്. 2019ല്‍ 1,06,251ന്റെ ഭൂരിപക്ഷത്തില്‍ വിജയിച്ച തോമസ് ചാഴിക്കാടന്‍ 87266 വോട്ടിനാണ് ഇത്തവണ പരാജയപ്പെട്ടത്.
എല്ലാക്കാലത്തും കെ.എം. മാണിക്കൊപ്പം നിന്ന രാഷ്ടീയ സുരക്ഷിത കേന്ദ്രങ്ങളാണ് ജോസിനെ കൈവിട്ടത്. കേരള കോണ്‍ഗ്രസിന് എന്നും താങ്ങും തണലുമായിരുന്ന കത്തോലിക്കാ സഭയുടെ പിന്തുണ പോലും ജോസിന് നഷ്ടമായി എന്നാണ് ചാഴികാടന്റെ പരാജയം സൂചിപ്പിക്കുന്നത്. ജൂലൈ ഒന്നിന് ഒഴിവ് വരുന്ന രാജ്യസഭ സീറ്റില്‍ ഒരെണ്ണം സിപിഎം നല്‍കിയില്ലെങ്കില്‍ ഇന്‍ഡി മുന്നണിയിലെ എംപി ഇല്ലാകക്ഷിയായി കേരള കോണ്‍ഗ്രസ് മാറും. ഒഴിവ് വരുന്ന മൂന്ന് രാജ്യസഭാ സീറ്റുകളില്‍ രണ്ടെണ്ണത്തില്‍ മാത്രമാണ് എല്‍ഡിഎഫിന് ജയിക്കാന്‍ സാധിക്കുന്നത്. സിപിഐക്ക് ഒരെണ്ണം കൊടുക്കേണ്ടതിനാല്‍ ജോസ് കെ.മാണിക്ക് സീറ്റ് കിട്ടാനുള്ള സാധ്യത വിരളമാണ്. ലോക്‌സഭാ സീറ്റ് നഷ്ടപ്പെട്ടതിന് പുറമെ ഇത് കൂടിയായാല്‍ താങ്ങാനാകില്ലെന്ന് കേരളാ കോണ്‍ഗ്രസ് നേതൃത്വം പറയുന്നത്.
നിലവില്‍ കേരളാ കോണ്‍ഗ്രസിന് സീറ്റ് നല്‍കാന്‍ കഴിയില്ലെന്ന നിലപാട് സിപിഎം നേതൃത്വം ജോസ് കെ. മാണിയെ അറിയിച്ചതായാണ് സൂചന. 2016ല്‍ വി.എസ്. അച്യുതാനന്ദനെ മൂലയ്‌ക്കിരുത്താന്‍ കാബിനറ്റ് റാങ്കോടു കൂടി സൃഷ്ടിച്ച ഭരണപരിഷ്‌കാര കമ്മിഷന്‍ ചെയര്‍മാന്‍ സ്ഥാനമാണ് മുന്നോട്ടു വച്ചിരിക്കുന്നത്.
ജന്മഭൂമി ഓണ്‍ലൈന്‍