ശ്രീനഗര്: ജമ്മു കശ്മീരിലെ പൂഞ്ചില് ബസ് കൊക്കയിലേക്ക് മറിഞ്ഞ് 21 പേര് മരിച്ചതായി റിപ്പോര്ട്ട്. 40 പേര്ക്ക് പരിക്കേറ്റിട്ടുണ്ട്. പൂഞ്ച് ഹൈവേയില് അക്നൂര് പ്രദേശത്ത് ഇന്നലെ വൈകിട്ട് മൂന്നരയോടെയാണ് അപകടമുണ്ടായത്. പരിക്കേറ്റവരെ അക്നൂര് ആശുപത്രിയില് പ്രവേശിപ്പിച്ചു.
ഉത്തര്പ്രദേശിലെ ഹാഥ്രസില് നിന്നാണ് യാത്ര ആരംഭിച്ച ബസാണ് അപകടത്തില്പ്പെട്ടത്. യാത്രക്കാരിലേറെയും യുപി, രാജസ്ഥാന്, ഹരിയാന എന്നിവിടങ്ങളില് നിന്നുള്ള തീര്ത്ഥാടകരായിരുന്നു. ഹരിയാനയിലെ കുരുക്ഷേത്രയില് നിന്ന് കശ്മീരിലെ ശിവഖോരിയിലേക്ക് പോവുകയായിരുന്നു ഇവര്.
യാത്രയ്ക്കിടെ ബസ് റോഡില്നിന്നും തെന്നിമാറി 150 അടി താഴ്ചയിലേക്ക് പതിക്കുകയായിരുന്നുവെന്ന് അധികൃതര് അറിയിച്ചു. പ്രദേശവാസികളാണ് ആദ്യം അപകടം കണ്ടത്. തുടര്ന്ന് ഇവര് അധികൃതരെ വിവരം അറിയിക്കുകയായിരുന്നു. അടിയന്തര ആരോഗ്യസംഘത്തെ സ്ഥലത്തേക്ക് അയച്ചതായും ആവശ്യമായ എല്ലാ സൗകര്യവും ഒരുക്കുമെന്നും സൈനിക വൃത്തങ്ങള് അറിയിച്ചു.
