ന്യൂഡല്ഹി: ജമ്മു കാശ്മീരിന് പ്രത്യേകപദവി റദ്ദാക്കിയ വിധി പുനഃപരിശോധിക്കണമെന്ന് ആവശ്യപ്പെട്ട് സമര്പ്പിച്ച ഹര്ജികള് സുപ്രീം കോടതി തള്ളി. ആര്ട്ടിക്കിള് 370 പ്രകാരം ജമ്മു കാശ്മീരിന് ഉണ്ടായിരുന്ന പ്രത്യേക പദവി എടുത്തുകളഞ്ഞ കേന്ദ്രസര്ക്കാരിന്റെ 2019 ആഗസ്റ്റ് 5ലെ തീരുമാനം ശരിവച്ച ഡിസംബര് 11ലെ സുപ്രീം കോടതി വിധിയെ ചോദ്യം ചെയ്ത് സമര്പ്പിച്ച ഹര്ജികളാണ് ചീഫ് ജസ്റ്റിസ് ഡി.വൈ ചന്ദ്രചൂഡിന്റെ നേതൃത്വത്തിലുള്ള അഞ്ചംഗ ബെഞ്ച് തള്ളിയത്. ജസ്റ്റിസുമാരായ സഞ്ജീവ് ഖന്ന, ബി.ആര് ഗവായ്, സൂര്യകാന്ത്, എഎസ് ബൊപ്പണ്ണ എന്നിവരായിരുന്നു ബെഞ്ചിലെ മറ്റ് ജഡ്ജിമാര്. കോടതിയുടെ മുന് വിധിയില് പിഴവില്ലെന്ന് ജഡ്ജിമാര് വ്യ്്ക്തമാക്കി.
ഗവേഷകനും ഐടി പ്രൊഫഷണലുമായ പങ്കജ് കുമുദ്ചന്ദ്ര ഫഡ്നിസും ജമ്മു കശ്മീരില് നിന്നുള്ള നാല് പേരും ഉള്പ്പെടെയുള്ളവര് സമര്പ്പിച്ച ഒരു കൂട്ടം പുനഃപരിശോധനാ ഹര്ജികളിലാണ് സുപ്രീം കോടതി അന്തിമ വിധി കല്പ്പിച്ചത്.
കേസില് 20ലധികം പുനഃപരിശോധനാ ഹര്ജികളാണ് സുപ്രീം കോടതിക്കു മുമ്പാകെ എത്തിയത്. ജമ്മു കശ്മീരില് നിന്നുള്ള ഹര്ജിക്കാരില് വിരമിച്ച വിചാരണ കോടതി ജഡ്ജി മുസാഫര് ഇഖ്ബാല് ഖാനും ഉള്പ്പെടുന്നു.
