തിരുവനന്തപുരം: ബോചെ എന്ന ബോബി ചെമ്മണ്ണൂരിന്റെ ‘ബോചെ ഭൂമിപുത്ര’ എന്ന കമ്പനിയ്‌ക്കെതിരെ കേസെടുത്ത് കേരള പൊലീസ്. ലോട്ടറി ഓഫീസറുടെ നിര്‍ദേശാനുസരണമാണ് കേസെടുത്തത്.
കേരള സംസ്ഥാന ലോട്ടറി വില്‍പ്പന ഇടിക്കുന്നുവെന്ന് ആരോപിച്ചാണ് വ്യവസായി ബോബി ചെമ്മണ്ണൂരിനെതിരെ കേസെടുത്തിരിക്കുന്നത്. ബോചെ ടീക്കൊപ്പം ദിവസവും പത്തു ലക്ഷം രൂപയുടെ ലക്കി ഡ്രോ നടത്തിയതിനാണ് കേസെടുത്തിരിക്കുന്നത്. വയനാട് ജില്ലാ അസിസ്റ്റന്‍റ് ജില്ലാ ലോട്ടറി ഓഫീസറുടെ പരാതിയില്‍ മേപ്പാടി പൊലീസാണ് കേസ് രജിസ്റ്റര്‍ ചെയ്തിരിക്കുന്നത്. ബോചെ ഭൂമിപത്ര എന്ന സ്വകാര്യകമ്പനിയുടെ മറവില്‍ ചായപ്പെടി വില്‍പ്പനയും പ്രെമോഷനുമെന്ന പേരില്‍ ചായപ്പൊടി പായ്‌ക്കറ്റിന്റെ ഒപ്പം ലോട്ടറി ടിക്കറ്റും വില്‍ക്കുന്നുവെന്നാണ് സര്‍ക്കാര്‍ വകുപ്പ് ആരോപിച്ചിരിക്കുന്നത്.
വിശദീകരണവുമായി ബോചെ
പൊലീസ് തനിക്കെതിരെ കേസെടുത്തതില്‍ വിശദീകരണവുമായി വ്യവസായി ബോബി ചെമ്മണൂര്‍.
‘ബോചെ ടീ ലക്കി ഡ്രോ’ ലോട്ടറിയല്ലെന്ന വിശദീകരണവുമായി ബോചെ എന്ന ബോബി ചെമ്മണൂര്‍ രംഗത്തെത്തി. ബോചെ ടിയുടെ പ്രമോഷന്റെ ഭാഗമായാണ് ലക്കി ഡ്രോയിലൂടെ ആളുകള്‍ക്ക് സമ്മാനങ്ങള്‍ നല്‍കുന്നത്. ഇത് ലോട്ടറിയല്ല. ഇതുസംബന്ധിച്ച് കോടതിയില്‍ വിശദീകരണം നല്‍കിയിട്ടുണ്ടെന്നും ബോബി ചെമ്മണൂര്‍ വിശദീകരിച്ചു. . 100 ഗ്രാമിന്റെ പാക്കറ്റ് ചായപ്പൊടിക്ക് 40 രൂപ മാത്രമാണ് ഈടാക്കുന്നതെന്നും ബോബി ചെമ്മണൂര്‍ പറഞ്ഞു.
പ്രമോഷന്റെ ഭാഗമായാണ് കൂടെ ലക്കി ഡ്രോ കൂപ്പണ്‍ നല്‍കുന്നത്. അമിതവില ഈടാക്കുന്നുവെന്ന പരാതിയിലും വസ്തുതയില്ലെന്ന് അദ്ദേഹം പറഞ്ഞു. ബംബര്‍ ലോട്ടറി നടത്താന്‍ ഉദ്ദേശിക്കുന്നില്ലെന്നും തേയിലക്കച്ചവടമാണ് ഉദ്ദേശ്യമെന്നും ബോചെ ടി വില്‍പ്പനയെത്തുടര്‍ന്ന് കേരള ഭാഗ്യക്കുറിയുടെ ടിക്കറ്റ് വില്‍പ്പന കുറഞ്ഞു എന്ന ആരോപണം വസ്തുതകള്‍ക്ക് നിരക്കുന്നതല്ലെന്നും ബോചെ പറഞ്ഞു.
ബോബി ചെമ്മണൂര്‍ വയനാട് മേപ്പാടിയിലെ എവിടി ഗ്രൂപ്പിന്റെ 1000 ഏക്കര്‍ തേയിലത്തോട്ടവും ഫാക്ടറിയും ബോചെ ഈയിടെ ഏറ്റെടുത്തിരുന്നു. ഇവിടുത്തെ തേയില പ്രൊമോട്ട് ചെയ്യാനാണ് ലക്കി ഡ്രോ ഏര്‍പ്പെടുത്തിയത് പറയപ്പെടുന്നു.
