കോഴിക്കോട് : കാമുകിയുടെ വീട്ടിലെത്തി കിടപ്പുമുറിയില്‍ അവര്‍ക്കൊപ്പം കിടന്ന യുവാവിനെ വെട്ടിപ്പരിക്കേല്‍പ്പിച്ച് ഭര്‍ത്താവ്. താമരശേരിക്ക് സമീപം കട്ടിപ്പാറ അമരാട് തിങ്കളാഴ്ച അര്‍ദ്ധരാത്രി കഴിഞ്ഞാണ് സംഭവം.
അരീക്കോട് സ്വദേശി ലുഹൈബിനെ (24) ആണ് യുവതിയുടെ ഭര്‍ത്താവ് പുതുപ്പാടി മലപുറം സ്വദേശി ഫാഹിസ് തലയിലും മുഖത്തും വെട്ടിയത്. സാരമായി പരിക്കേറ്റ ലുഹൈബിനെ കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
യുവതിയുടെ അമ്മവീട്ടിലാണ് ഇവര്‍ താമസിക്കുന്നത്.കൂട്ടുകാരിയുടെ വീട്ടിലേക്കെന്നു പറഞ്ഞ് രണ്ടു വയസായ കുഞ്ഞുമായി യുവതി മൂന്ന് ദിവസം മുമ്പ് വീട്ടില്‍നിന്ന് പോയിരുന്നു.എന്നാല്‍ അവര്‍ ലുഹൈബിന്റെ വീട്ടിലായിരുന്നെന്നാണ് അറിയുന്നത്. തുടര്‍ന്ന് ഫാഹിസ് പൊലീസില്‍ പരാതി നല്‍കിയതിനു പിന്നാലെ കഴിഞ്ഞ രാത്രി 11 മണിയോടെ ലുഹൈബിന്റെ ബന്ധുക്കള്‍ യുവതിയെ താമരശേരി പൊലീസ് സ്റ്റേഷനില്‍ എത്തിച്ചു.
ഫാഹിസും ബന്ധുക്കളുമായി പൊലീസ് ചര്‍ച്ച നടത്തിയ ശേഷം പന്ത്രണ്ടരയോടെ യുവതി ഫാഹിസിനൊപ്പം വീട്ടിലേക്കു മടങ്ങി. പിന്നാലെ അവിടെയെത്തിയ ലുഹൈബ് കിടപ്പുമുറിയിലിരുന്നു സംസാരിക്കുകയായിരുന്ന ഫാഹിസിന്റെയും യുവതിയുടെയും അടുത്തെത്തി.ഭര്‍ത്താവ് നോക്കി നില്‍ക്കെ യുവതിക്കൊപ്പം കട്ടിലിലേക്കു കിടക്കുകയും ചെയ്തു!
ഇതു കണ്ട് വിറളി പിടിച്ച ഫാഹിസ് ടേബിള്‍ ഫാന്‍ കൊണ്ട് ലുഹൈബിനെ മര്‍ദിച്ച ശേഷം അടുക്കളയില്‍നിന്നു കത്തിയെടുത്ത് ലുഹൈബിനെ വെട്ടി. ഇതോടെ രക്തം ഒലിപ്പിച്ച് വീട്ടില്‍നിന്ന് ഇറങ്ങിയോടിയ ലുഹൈബിനൊപ്പം യുവതിയും പാഞ്ഞു. ലുഹൈബ് കട്ടിപ്പാറ അങ്ങാടിയില്‍ എത്തിയപ്പോള്‍ നാട്ടുകാരാണ് ആംബുലന്‍സ് വിളിച്ചു താമരശേരി താലൂക്ക് ആശുപത്രിയില്‍ എത്തിച്ചത്. പ്രാഥമിക ചികിത്സയ്‌ക്കു ശേഷം കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റി. കാമുകിയും ലുഹൈബിനൊപ്പമുണ്ട്.
