ചാങ്ഷ(ചൈന): ബില്ലി ജീന് കിങ് കപ്പ് വനിതാ ടെന്നിസില് ഭാരത ടീമിന് വിജയത്തുടര്ച്ച. ഇന്നലെ നടന്ന മത്സരത്തില് കൊറിയയെ പരാജയപ്പെടുത്തി. 2-1നായിരുന്നു ഭാരത വനിതകളുടെ വിജയം.
ഭാരത്തിനായി റുതുജ ഭോസാലെ ആദ്യ മത്സരം വിജയിച്ചു. നേരിട്ടുള്ള സെറ്റുകള്ക്ക് കൊറിയക്കാരി സൊഹ്യൂന് പാര്കിനെ ആണ് തോല്പ്പിച്ചത്(6-2, 6-2). രണ്ടാം മത്സരത്തിനിറങ്ങിയ സിംഗിള്സ് താരം അങ്കിത റെയ്ന പരാജയപ്പെട്ടു. സൂജോങ് ജാങ്ങിനോട് നേരിട്ടുള്ള സെറ്റിന് താരം തോല്ക്കുകയായിരുന്നു(2-6, 3-6). ഇതോടെ മത്സരം 1-1ന് ഒപ്പത്തിലായി. നിര്ണായകമായ മൂന്നാം പോരാട്ടത്തില് ഭാരതത്തിനായി ഇരട്ട സഖ്യം വിജയം നേടിയെടുത്തു. അങ്കിതയും പ്രാര്ത്ഥന തോംബറെയും അടങ്ങുന്ന സഖ്യം കിം ഡാബിന്- സൊഹ്യൂന് പാര്ക് സഖ്യത്തെയാണ് നേരിട്ടുള്ള സെറ്റുകള്ക്ക് തോല്പ്പിച്ചത്(6-4, 6-4).
ഏഷ്യാ-ഓഷ്യാന ഗ്രൂപ്പ് ഒന്നിലാണ് നിലവില് ഭാരതത്തിന്റെ പോരാട്ടം. ഇതിന്റെ ലീഗ് റൗണ്ട് മത്സരങ്ങളാണ് ഇപ്പോള് നടന്നുവരുന്നത്. കഴിഞ്ഞ ദിവസം ചൈനീസ് തായ്പേയിയെ പരാജയപ്പെടുത്തിയിരുന്നു. ലീഗ് റൗണ്ടില് ഇന്ന് നടക്കുന്ന ഭാരതത്തിന്റെ അവസാന മത്സരത്തില് ന്യൂസിലന്ഡിനെ നേരിടും.
