മാഡ്രിഡ്: ലോക ഒന്നാം നമ്പര്‍ താരം ജാന്നിക് സിന്നര്‍ വീണ്ടും ചരിത്രം കുറിച്ചു. ഗ്രാന്‍ഡ് സ്ലാമുകള്‍ക്ക് താഴെയുള്ള ഏറ്റവും ഉയര്‍ന്ന ഘട്ടമായ എടിപി മാസ്റ്റേഴ്‌സ് 1000ല്‍ തുടര്‍ച്ചയായി അഞ്ച്് കിരീടങ്ങള്‍ നേടുന്ന ഏറ്റവും പ്രായം കുറഞ്ഞ പുരുഷ താരമായി സിന്നര്‍ മാറി.
മാഡ്രിഡ് ഓപ്പണ്‍ മാസ്റ്റേഴ്‌സ് ഫൈനലില്‍ ലോക മൂന്നാം നമ്പര്‍ താരം അലക്‌സാണ്ടര്‍ സ്വരേവിനെ 6-1, 6-2 എന്ന ഏകപക്ഷീയ സ്‌കോറിന് കീഴടക്കിയാണ് ഈ നേട്ടം. മത്സരത്തിന്റെ തുടക്കം മുതല്‍ ആധിപത്യം പുലര്‍ത്തിയ സിന്നര്‍, എതിരാളിക്ക് ഒരു അവസരം പോലും നല്‍കാതെയാണ് കിരീടം സ്വന്തമാക്കിയത്. നേരത്തെ ഇന്ത്യന്‍വെല്‍സ്, മയാമി, മോണ്ടികാര്‍ലോ, പാരീസ് എന്നിവയിലും സിന്നര്‍ കിരീടം നേടിയിരുന്നു.
ലോക ടെന്നീസിലെ ഉയര്‍ന്നുവരുന്ന പ്രതിഭയായ ജാന്നിക്ക് സിന്നറുടെ അതുല്യ പ്രകടനം തുടരുന്നു. ഗ്രൗണ്ട്‌ഷോട്ടുകള്‍ കേന്ദ്രീകരിച്ച് കളിക്കുന്ന സിന്നര്‍ നിര്‍ണായക ഘട്ടങ്ങളില്‍ ഡ്രോപ് ഷോട്ടുകള്‍ ഉപയോഗിക്കുകയും ചെയ്യുന്നതാണ് മാഡ്രിഡിലെ വിജയത്തിന് പിന്നിലുള്ള പ്രധാന ഘടകങ്ങള്‍.
സീസണ്‍ തുടക്കത്തില്‍ നോവാക് ജോക്കോവിച്ചിനെതിരെ ഓസ്‌ട്രേലിയന്‍ ഓപ്പണ്‍ സെമിയില്‍ തോറ്റെങ്കിലും അതിന് ശേഷമുള്ള സിന്നറുടെ തിരിച്ച് വരവ് ശ്രദ്ധേയമാണ്. ഈ മാസം അവസാനം നടക്കുന്ന് ഫ്രഞ്ച് ഓപ്പണ്‍ ഉള്‍പ്പെടെ മുന്നിലുള്ള പ്രധാന ടൂര്‍ണമെന്റുകളില്‍ ലോക ഒന്നാം നമ്പര്‍ താരത്തിന്റെ പ്രതീക്ഷള്‍ വളരെ വലുതാണ്. റോം, പാരിസ്, ടൂര്‍ണമെന്റുകള്‍ക്കിടയിലെ തിരക്കേറിയ മത്സരക്രമങ്ങള്‍ സിന്നറുടെ ശാരീരീക ക്ഷമതയെ പരീക്ഷിക്കുമെന്നാണ് വിലയിരുത്തല്‍. തുടര്‍ച്ചയായ വിജയങ്ങളോടെ ലോക ടെന്നീസില്‍ തന്റെ ആധിപത്യം ഉറപ്പിച്ച താരം ഇനി വലിയ കിരീടങ്ങളിലേക്കാണ് കണ്ണുവെക്കുന്നത്.
