വെള്ളറട: ഒറ്റശേഖരമംഗലം ഗ്രാമപഞ്ചായത്തിലെ പ്ലാമ്പഴഞ്ഞി പേരക്കോണം ഓലട്ടിമൂട് ഭാഗങ്ങളില്‍ കുടിവെള്ളമില്ല. റോഡ് തകര്‍ന്ന് വാഹനഗതാഗതം നിലച്ചു. തെരഞ്ഞെടുക്കപ്പെട്ട എംപിയും എംഎല്‍എയും തിരിഞ്ഞുനോക്കുന്നില്ലെന്നാണ് നാട്ടുകാരുടെ പരാതി. ഇതിനെത്തുടര്‍ന്നാണ് തെരഞ്ഞെടുപ്പ് ബഹിഷ്‌കരിക്കാന്‍ തീരുമാനം. കുന്നിന്‍പ്രദേശമായ ഈ ഭാഗത്ത് റോഡ് തകര്‍ന്നിട്ട് വര്‍ഷങ്ങള്‍ കഴിഞ്ഞു.
കെഎസ്ആര്‍ടിസി സര്‍വീസുകളടക്കം നിര്‍ത്തലാക്കി. കുടിവെള്ളം നിലച്ചിട്ട് നാളുകള്‍ ഏറെയായി. നിരവധി പരാതികള്‍ നല്‍കിയെങ്കിലും ആരും തിരിഞ്ഞുനോക്കാനില്ല. കിലോമീറ്റര്‍ നടന്നാല്‍ പോലും കുടിവെള്ളം ശേഖരിക്കാന്‍ കഴിയാത്ത അവസ്ഥ. അധികൃതര്‍ ആരും ഈ ഭാഗത്തേക്ക് തിരിഞ്ഞുനോക്കുന്നില്ല.
റോഡിന്റെ തകര്‍ച്ച കാരണം കൊള്ളാവുന്ന റോഡ് എത്തുന്ന ഭാഗത്ത് സ്ഥാനാര്‍ത്ഥികളും പ്രവര്‍ത്തകരും എത്തി മടങ്ങുകയാണ.് പ്രദേശത്തെ വോട്ടര്‍മാരെയും അവരുടെ കഷ്ടപ്പാടുകളും അറിയാന്‍ ആരും എത്തുന്നില്ല എന്നതാണ് ആരോപണം. പ്രദേശവാസികള്‍ ഒന്നടങ്കം ഇപ്രാവശ്യത്തെ തെരഞ്ഞെടുപ്പ് ബഹിഷ്‌കരിക്കാന്‍ തീരുമാനിച്ചിട്ടുണ്ട്.
