കോഴിക്കോട് : കോഴിക്കോട് മെഡിക്കല്‍ കോളേജിലെ ഐസിയു പീഡനക്കേസില്‍ അതിജീവിതയെ പിന്തുണച്ച നഴ്സ് പി ബി അനിതയെ കോഴിക്കോട് മെഡിക്കല്‍ കോളജില്‍ തന്നെ നിയമിച്ച് ഉത്തരവിറക്കി.ഏറെ അനിശ്ചിതത്വത്തിന് ശേഷം മെഡിക്കല്‍ വിദ്യാഭ്യാസ ഡയറക്ടറാണ് ഉത്തരവ് ഇറക്കിയത്.
ഹൈക്കോടതിയുടെ വിധിയ്‌ക്ക് വിധേയമായാണ് നിയമനം.ഹൈക്കോടതി വിധി ഉണ്ടായിട്ടും നിയമനം നല്‍കാത്തതിനെ തുടര്‍ന്ന് ആറ് ദിവസമായി അനിത ആശുപത്രിക്ക് മുന്നില്‍ സമരം നടത്തുകയായിരുന്നു.
നിയമനം നല്‍കാത്തത് ചോദ്യം ചെയ്ത് അനിത നല്‍കിയ ഹര്‍ജി തിങ്കളാഴ്ച കോടതിയുടെ പരിഗണനയ്‌ക്ക് വരാനിരിക്കെയാണ് ഇന്ന് രാത്രി നിയമന ഉത്തരവിറങ്ങിയത്.ഐ.സി യു പീഡനക്കേസ് അതിജീവിതയും സമരത്തിന്റെ ഭാഗമായി അനിതയ്‌ക്കൊപ്പമുണ്ടായിരുന്നു.
അതിജീവിതയെ ആശുപത്രി ജീവനക്കാരായ അഞ്ചു പേര്‍ ഭീഷണിപ്പെടുത്തിയത് അനിതയുടെ നിരുത്തരവാദപരമായ സമീപനം കൊണ്ടാണ് എന്നായിരുന്നു ഡിഎംഇ റിപ്പോര്‍ട്ട് . ഇതിന്റെ അടിസ്ഥാനത്തിലാണ് ഇടുക്കി മെഡിക്കല്‍ കോളജിലേക്ക് സ്ഥലം മാറ്റിയത് ഇതിനെതിരെയാണ് ഹൈക്കോടതിയില്‍ നിന്ന് അനുകൂല അനിത ഉത്തരവ് നേടിയത്. സി പി എം അനുകൂല സംഘടനയാണ് അനിതയ്‌ക്കെതിരെ രംഗത്തുണ്ടായിരുന്നത്.
