പൂക്കോട് വെറ്ററിനറി കോളേജ് ഹോസ്റ്റലില്‍ കൊല്ലപ്പെട്ട സിദ്ധാര്‍ത്ഥന്റെ അച്ഛന്‍ ജയപ്രകാശിന് രാഹുല്‍ ഗാന്ധി നല്‍കിയ ഉറപ്പു കേട്ട് വയനാട്ടുകാര്‍ ഉള്ളില്‍ ചിരിക്കുന്നുണ്ടാവണം. മകന്‌റെ മരണത്തിന് ഉത്തരവാദികളായവരെ മുഴുവന്‍ നിയമത്തിനു മുന്നില്‍ കൊണ്ടുവരുന്നതുവരെ ഒപ്പം നില്‍ക്കുമെന്നാണ് രാഹുല്‍ പറഞ്ഞത്. ഇക്കാര്യത്തില്‍ ഏതറ്റം വരെ പോകാനും കൂടെയുണ്ടാകും എന്നും അദ്ദേഹം ജയപ്രകാശിനെ കണ്ട് ഉറപ്പുനല്‍കി. കഴിഞ്ഞ ദിവസം നാമനിര്‍ദ്ദേശപത്രിക നല്‍കാന്‍ വയനാട്ടില്‍ എത്തിയപ്പോഴായിരുന്നു കോണ്‍ഗ്രസ് നേതാവ് രാഹുല്‍ ഗാന്ധി സിദ്ധാര്‍ത്ഥന്റെ വീട് സന്ദര്‍ശിച്ചത്. ഈ ഉറപ്പിന്റെ വാര്‍ത്ത യുഡിഎഫ് അനുകൂല പത്രങ്ങള്‍ മുഖ്യപേജില്‍ തന്നെ നന്നായി നല്‍കിയിട്ടുണ്ട്. എന്നാല്‍ അഞ്ചു വര്‍ഷത്തിനിടെ സ്വന്തം മണ്ഡലത്തില്‍ പത്തു തവണ ഏതാനും മണിക്കൂറുകള്‍ മാത്രം സന്ദര്‍ശിച്ച് മടങ്ങിയ ആളാണ് രാഹുല്‍ എന്നതാണ് വയനാട്ടുകാര്‍ ചൂണ്ടിക്കാട്ടുന്നത്. എംപി എന്ന നിലയ്‌ക്ക് വയനാട്ടുകാര്‍ക്ക് നല്‍കിയ വാഗ്ദാനങ്ങള്‍ പാലിക്കാത്ത, അന്നാട്ടുകാര്‍ക്കൊപ്പം കുറച്ചു ദിവസങ്ങളെങ്കിലും കൂടെ നില്‍ക്കാന്‍ സമയമില്ലാത്ത രാഹുലാണ് ഈ ഉറപ്പും കൊടുത്ത് പൊടിതട്ടി മടങ്ങിപ്പോയത്. മണ്ഡലത്തില്‍ ഒരു വി.വി.ഐ.പിയായി മാത്രം വന്നുപോകുന്ന ഒരാള്‍ എങ്ങിനെ കൂടെ നില്‍ക്കുമെന്നാണ് പറയുന്നതെന്നാണ് അന്നാട്ടുകാര്‍ ഉയര്‍ത്തുന്ന ചോദ്യം. സിദ്ധാര്‍ത്ഥന്റെ കൊലപാതകം സി.ബി.ഐക്ക് വിടണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയന് കത്തു നല്‍കിയത് താനാണെന്നും രാഹുല്‍ അവകാശപ്പെട്ടിരുന്നു. അതൊരു ആനക്കാര്യം തന്നെയാണെന്നും വയനാട്ടുകാര്‍ പരിഹസിക്കുന്നു.
