പാലക്കാട്: എസ്ഡിപിഐയുമായുള്ള സഖ്യത്തോടെ ഇന്ത്യന് നാഷണല് കോണ്ഗ്രസ് താലിബാന് കോണ്ഗ്രസായി മാറിയെന്ന് ബിജെപി സംസ്ഥാന വൈസ്. പ്രസിഡന്റ് അഡ്വ. ബി. ഗോപാലകൃഷ്ണ് മാധ്യമങ്ങളോട് പറഞ്ഞു. പോപ്പുലര് ഫ്രണ്ട് ഓഫ് ഇന്ത്യ, പോപ്പുലര് ഫ്രണ്ട് ഓഫ് കോണ്ഗ്രസായി മാറിക്കൊണ്ടിരിക്കുന്നു. ഭീകരവാദികളുമായുള്ള സഖ്യം ഹിന്ദുക്കള്ക്കും, ക്രിസ്ത്യാനികള്ക്കുമെതിരെയുള്ള സഖ്യമാണ്. രാജ്യവിരുദ്ധരുടെ വോട്ട് വേണ്ടെന്ന് പറയാന്നുള്ള തന്റേടം കേരളത്തിലെ കോണ്ഗ്രസിനും ഇടതുപക്ഷത്തിനും ഉണ്ടോയെന്നും ഗോപാലകൃഷ്ണന് ചോദിച്ചു.
കേരളത്തില് മണിപ്പൂര് സംരക്ഷണ സമിതിയല്ല, കരുവന്നൂര് സംരക്ഷണസമിതിയാണ് ഇടതുപക്ഷം നടത്തേണ്ടത്. കരുവന്നൂരിനെ മറക്കാനും, മറയ്ക്കാനും മണിപ്പൂര് വിഷയം ഉയര്ത്തിക്കാട്ടുകയാണ്. മണിപ്പൂരിലെ ക്രൈസ്തവരുടെ കാര്യം പറയുന്ന ഇടതുപക്ഷം, ആത്മഹത്യയുടെ വക്കില് നില്ക്കുന്ന കരുവന്നൂരിലെ പാവപ്പെട്ട ക്രൈസ്തവരുടെ അവസ്ഥ കണ്ടില്ലെന്ന് നടിക്കുന്നു. ഇക്കാര്യത്തില് മുഖ്യമന്ത്രി പിണറായി വിജയനും, സിപിഎമ്മും മൗനം പാലിക്കുന്നു. കരുവന്നൂരിലെ പാവപ്പെട്ടവര്ക്കായി സംരക്ഷണ സദസ് നടത്താന് മുഖ്യമന്ത്രി പിണറായി വിജയന് ധൈര്യമുണ്ടോയെന്നും അദ്ദേഹം ചോദിച്ചു. കരുവന്നൂരിലെ കള്ളന്മാരാണ് തൃശ്ശൂരിലെയടക്കം പ്രധാനപ്പെട്ട എല്ഡിഎഫ് സ്ഥാനാര്ത്ഥികളുടെ താക്കോല് സ്ഥാനത്തിരിക്കുന്നതെന്നും ഗോപാലകൃഷ്ണന് ആരോപിച്ചു. കരുവന്നൂര് വിഷയത്തില് മുന് എംപിമാരടക്കം പലരും അഴിക്കുള്ളിലാവുമെന്നും അദ്ദേഹം പറഞ്ഞു.
18-ാം ലോകസഭ തെരഞ്ഞെടുപ്പില് ബിജെപി ജയിച്ചാല് ഇന്ത്യ കത്തിക്കുമെന്ന് പറഞ്ഞ രാഹുല്, ഇന്ത്യ എന്താണെന്ന് ഇതുവരെയും മനസിലാക്കിയിട്ടില്ല. രാഹുല്ഗാന്ധി മൂഢസ്വര്ഗത്തിലാണ് കഴിയുന്നതെന്നും ഗോപാലകൃഷ്ണന് പറഞ്ഞു. ബിജെപി പാലക്കാട് ജില്ലാ അധ്യക്ഷന് കെ.എം. ഹരിദാസും അദ്ദേഹത്തോടൊപ്പം ഉണ്ടായിരുന്നു.
