ന്യൂദല്‍ഹി: പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ കേന്ദ്രസര്‍ക്കാര്‍ വനിതാശാക്തീകരണത്തിനായി നടപ്പാക്കിയ വിവിധ പദ്ധതികളുടെ പ്രചാരണത്തിനായി മഹിളാ മോര്‍ച്ച മൂന്നു ദിവസത്തെ പ്രത്യേക കാമ്പയിന് സംഘടിപ്പിക്കുന്നു. ശക്തി വന്ദന്‍ റണ്‍ എന്നു പേരിട്ടിരിക്കുന്ന കൂട്ടയോട്ടം ഇന്ന് രാജ്യത്തെ 988 ജില്ലകളില്‍ സംഘടിപ്പിക്കും.
വികസിത ഭാരത സങ്കല്പം, സ്ത്രീകള്‍ക്കായുള്ള കേന്ദ്രസര്‍ക്കാരിന്റെ വിവിധ ക്ഷേമപദ്ധതികള്‍ എന്നിവയെക്കുറിച്ചുള്ള ഒരു വിവരണവും കൂട്ടയോട്ടത്തിന് മുന്നോടിയായി ഉണ്ടാകും.
രാജ്യത്തെ 4123 നിയോജക മണ്ഡലങ്ങളിലും നാളെ പദയാത്രയോ ബൈക്ക് റാലിയോ സംഘടിപ്പിക്കും. ആറിന് ബംഗാളിലെ ബരാസത്തിലെ വനിതാ സമ്മേളനത്തെ പ്രധാനമന്ത്രി നരേന്ദ്രമോദി അഭിസംബോധന ചെയ്യുന്നത് രാജ്യത്തുടനീളമുള്ള എല്ലാ മണ്ഡലങ്ങളിലും തത്സമയം സംപ്രേഷണം ചെയ്യും. മഹിളാമോര്‍ച്ച പ്രവര്‍ത്തകര്‍ ഉള്‍പ്പെടെയുള്ള വനിതകള്‍ പ്രധാനമന്ത്രിയുടെ പ്രസംഗം തത്സമയം വീക്ഷിക്കും.
