തിരുവനന്തപുരം: പൂക്കോട് വെറ്ററിനറി സര്‍വകലാശാല വിദ്യാര്‍ത്ഥി സിദ്ധാര്‍ത്ഥന്റെ മരണം സിബിഐ പോലുള്ള കേന്ദ്ര ഏജന്‍സികള്‍ അന്വേഷിക്കണമെന്ന് സുരേഷ്‌ഗോപി. സിദ്ധാര്‍ത്ഥന്റെ വീട്ടിലെത്തിയ അദ്ദേഹം കുടുംബത്തെ ആശ്വസിപ്പിച്ചു.
സിദ്ധാര്‍ത്ഥന്റെ മരണത്തിന് പിന്നിലുള്ള സത്യാവസ്ഥ കണ്ടെത്തണമെന്നും കുറ്റക്കാര്‍ക്ക് കടുത്ത ശിക്ഷ നല്കണമെന്നും സുരേഷ് ഗോപി ആവശ്യപ്പെട്ടു. ഒളിക്കാനും മറയ്‌ക്കാനും രക്ഷിക്കാനുമൊന്നുമില്ലെങ്കില്‍ കാലതാമസം കൂടാതെ സിബിഐയെപ്പോലൊരു ഏജന്‍സിയെ അന്വേഷണം ഏല്‍പ്പിക്കണം. സിദ്ധാര്‍ത്ഥന്റെ മരണം അധ്യയനത്തില്‍ ഏര്‍പ്പെട്ടിരിക്കുന്ന മക്കളുള്ള എല്ലാ അച്ഛനമ്മമാരേയും വേദനിപ്പിച്ചിരിക്കുകയാണ്. ഈയൊരു അവസ്ഥയ്‌ക്ക് തീര്‍പ്പുകല്‍പ്പിക്കണം. സൗഹൃദം വളര്‍ത്തേണ്ട പ്രായത്തിലാണ് കാമ്പസുകളിലും കൊലപാതകങ്ങള്‍ ഉള്‍പ്പടെയുള്ള സംഭവങ്ങള്‍ ഉണ്ടാകുന്നത്. സമാനമായ സാഹചര്യം തൃശ്ശൂരിലും ഉണ്ടായിട്ടുണ്ട്. തൃശ്ശൂരില്‍ ഒരു പെണ്‍കുട്ടിക്ക് നേരെ നടന്ന വിഷയം പുറത്തു വന്നിട്ടുണ്ട്. നികൃഷ്ടവും പൈശാചികവുമായ അവസ്ഥ വിദ്യാര്‍ത്ഥി രാഷ്‌ട്രീയ മേഖലയില്‍ എത്രയോ വര്‍ഷമായി കാണുന്നുണ്ട്. വലിയ സ്‌ഫോടനാത്മകമായ തിരിച്ചടി ഇതിനെ പിന്തുണയ്‌ക്കുന്നവര്‍ക്ക് ഉറപ്പായും കിട്ടും.
പിന്തുണയ്‌ക്കാനും തെളിവ് നശിപ്പിക്കാനും പ്രതികള്‍ക്ക് കുടപിടിക്കാനും നടക്കുന്നവരുണ്ടെങ്കില്‍ അവരാണ് ശരിയായ ആസൂത്രകര്‍. രാജാവ് കള്ളനല്ലെന്ന് ആദ്യം വിശ്വാസം വരണം. ആദ്യം അറസ്റ്റുചെയ്യേണ്ടത് വൈസ് ചാന്‍സലറെയാണ്. ക്രിമിനലുകളാണോ ഇപ്പോള്‍ വിസിയും ഡീനുമൊക്കെയാവുന്നതെന്നും സുരേഷ്‌ഗോപി ചോദിച്ചു. സിദ്ധാര്‍ത്ഥന്റെ കുടുംബത്തോടൊപ്പം നിന്ന് നീതി ഉറപ്പാക്കുമെന്നും അദ്ദേഹം പറഞ്ഞു.
