മലപ്പുറം: കരാട്ടെ മാസ്റ്റര്‍ സിദ്ദീഖ് അലിയുടെ പീഡനത്തെത്തുടര്‍ന്ന് പെണ്‍കുട്ടി പഠനം നിര്‍ത്തിയതെന്ന് മലപ്പുറം എടവണ്ണപ്പാറയിലെ സ്കൂള്‍ അധ്യാപകര്‍. പെണ്‍കുട്ടി അധ്യാപകന്റെ പീഡനത്തെതുടര്‍ന്ന് കടുത്ത മാനസികസമ്മര്‍ദ്ദത്തിലൂടെയാണ് കടന്നുപോയതെന്നും വിവരം ചൈല്‍ഡ് ലൈനിനെ രണ്ട് വട്ടം അറിയിച്ചിരുന്നുവെങ്കിലും ഇടപെടല്‍ വൈകിയെന്നും അധ്യാപകര്‍.
കടുത്ത മാനസിക സമ്മര്‍ദ്ദമാണ് പിന്നീട് പെണ്‍കുട്ടിയുടെ ദുരൂഹമരണത്തിലേക്ക് നയിച്ചത്. പഠനത്തിലും പാഠ്യേതര വിഷയത്തിലും മുന്നില്‍ നിന്ന മിടുക്കിയായ പെണ്‍കുട്ടിയായിരുന്നു ദുരൂഹസാഹചര്യത്തില്‍ മരിച്ചത്. പെണ്‍കുട്ടിയുടെ മൃതദേഹം വെള്ളത്തില്‍ പൊന്തിക്കിടക്കുന്ന നിലയിലാണ് കണ്ടെത്തിയത്. കൊലപാതകമാണെന്ന് കൂടി സംശയിക്കപ്പെട്ടിരുന്നു.
അധ്യാപകര്‍ നേരത്തെ എല്ലാ പിന്തുണയും കുട്ടിയ്‌ക്ക് ഉറപ്പ് നല്‍കുകയും കൗണ്‍സിലിങ് നല്‍കുകയും ചെയ്തിട്ടും മാനസിക ബുദ്ധിമുട്ടുകളെ തുടർന്ന് പെൺകുട്ടി പഠനം നിർത്തുകയായിരുന്നു. വളരെ സ്മാര്‍ട്ടായിരുന്നു കുട്ടിയായിരുന്നുവെന്നും അധ്യാപകര്‍ പറയുന്നു.
സ്കൂളിൽ തുടരാൻ ഉപദേശിച്ചെങ്കിലും ടിസി വാങ്ങിപ്പോയി. കരാട്ടെ അധ്യാപകനായ സിദ്ദീഖ് അലി പീഡിപ്പിച്ച കാര്യം കുട്ടി പറഞ്ഞിരുന്നു. പെണ്‍കുട്ടി കടുത്ത മാനസിക സമ്മര്‍ദ്ദത്തിലൂടെയായിരുന്നു കടന്നുപോയത് വിവരം ചൈല്‍ഡ് ലൈനിനെ രണ്ട് വട്ടം അറിയിച്ചിരുന്നു. വിവരങ്ങള്‍ പൊലീസ് അന്വേഷിക്കാൻ തുടങ്ങിയതോടെ കുട്ടി മാനസികമായി വീണ്ടും പ്രതിസന്ധിയിലായി. കേസില്‍ വീണ്ടും അന്വേഷണം നടത്തിയെങ്കിലും കരാട്ടെ മാസ്റ്റര്‍ക്കെതിരെ നടപടി വൈകുന്നതും പെണ്‍കുട്ടിയെ വിഷമിപ്പിച്ചിരുന്നു.
കേസില്‍ തുടര്‍ നടപടികളുണ്ടാകാതിരുന്നത് കുട്ടിയെ മാനസികമായി തളര്‍ത്തിയിരുന്നുവെന്നും കൊലപാതകമാണെന്ന് തന്നെയാണ് സംശയമെന്നും കുട്ടിക്ക് നീതി ലഭിക്കണമെന്നും അധ്യാപകര്‍ പറഞ്ഞു. പെണ്‍കുട്ടിയുടെ മൃതദേഹം ചാലിയാര്‍ പുഴയില്‍ കണ്ടെത്തിയതിനെ തുടര്‍ന്ന് പൊലീസ് സിദ്ദീഖ് അലിയെ അറസ്റ്റ് ചെയ്തിട്ടുണ്ട്.
വിദ്യാര്‍ത്ഥിനിയുടെ മരണത്തില്‍ സംസ്ഥാന ബാലാവകാശ കമ്മീഷൻ സ്വമേധയാ കേസെടുത്തു. കരാട്ടെ അധ്യാപകനെതിരെ കൂടുതൽ കുട്ടികൾ പരാതിയുമായി മുന്നോട്ട് വരുന്ന സാഹചര്യത്തിലാണ് സ്വമേധയാ കേസെടുത്തത്. സംഭവത്തിൽ വാഴക്കാട് സിഐയിൽ നിന്ന് കമ്മീഷൻ റിപ്പോർട്ട് തേടി.
