തിരുവനന്തപുരം: നേമത്തിന് സമീപം കാരയ്‌ക്കാമണ്ഡപത്ത് വീട്ടില്‍ പ്രസവത്തിനിടെ അമ്മയും കുഞ്ഞും മരിച്ച സംഭവത്തില്‍ യുവതിയുടെ ഭര്‍ത്താവിന്റെ ആദ്യഭാര്യയെ പ്രതിചേര്‍ത്തു. കേസില്‍ രണ്ടാം പ്രതിയാണ് ഇവര്‍. വീട്ടില്‍ പ്രസവിക്കാന്‍ പ്രേരിപ്പിച്ചതിനാണ് നയാസിന്റെ ആദ്യഭാര്യ റജീനയെ പ്രതിചേര്‍ത്തത്.
ഗര്‍ഭസ്ഥശിശു മരിക്കാനിടയായ സാഹചര്യം, മനഃപൂര്‍വമല്ലാത്ത നരഹത്യ എന്നീ കുറ്റങ്ങളാണ് റജീനയ്‌ക്കെതിരെ ചുമത്തിയത്. റജീന ഒളിവിലാണ്.
സംഭവത്തില്‍ യുവതിക്ക് അക്യുപംഗ്ചര്‍ ചികിത്സ നടത്തിയ ഷിഹാബുദ്ദീനെ എറണാകുളത്തുനിന്ന് നേമം പൊലീസ് പിടികൂടിയിരുന്നു.ഷെമീറയ്‌ക്ക് ആശുപത്രിയില്‍ ചികിത്സ നല്‍കുന്നത് ഇയാള്‍ തടഞ്ഞെന്ന ഭര്‍ത്താവ് നയാസിന്റെ മൊഴി പ്രകാരമാണ് അറസ്റ്റ്.
വെഞ്ഞാറമൂട് സ്വദേശി ഷിഹാബുദ്ദീന്‍ ബീമാപള്ളിയിലാണ് ക്ലിനിക്ക് നടത്തിയിരുന്നത്. പ്രമേഹം മാറ്റാമെന്ന് വാഗ്ദാനം ചെയ്ത് പണം വാങ്ങുന്നുവെന്ന വിവരത്തെ തുടര്‍ന്ന് സ്പെഷ്യല്‍ ബ്രാഞ്ച് അന്വേഷണം നടത്തി വ്യാജ ചികിത്സ നടത്തുന്നതായി റിപ്പോര്‍ട്ട് നല്‍കിയെങ്കിലും പൊലീസോ ആരോഗ്യവകുപ്പോ നടപടികള്‍ സ്വീകരിച്ചിരുന്നില്ല.
മരിച്ച ഷെമീറയുടെ ഭര്‍ത്താവ് പൂന്തുറ സ്വദേശി നയാസ് റിമാന്‍ഡിലാണ്. ഇക്കഴിഞ്ഞ ചൊവ്വാഴ്ച വൈകിട്ട് പഴയകാരയ്‌ക്കാമണ്ഡപത്തിനു സമീപം തിരുമംഗലം ലെയ്നിലാണ് ഷെമീറയും നവജാത ശിശുവും പ്രസവത്തിനിടെ മരിച്ചത്.
