തിരുവനന്തപുരം: വന്ദേഭാരത് എക്സ്പ്രസിന്റെ സർവീസ് മംഗലാപുരത്തേയ്‌ക്ക് നീട്ടി റെയിൽവേ ബോർഡ്. ആലപ്പുഴ വഴി കാസർകോട്ടേയ്‌ക്ക് പോകുന്ന 20632/ 20631വന്ദേഭാരത് സർവ്വീസുകളിലാണ് മാറ്റം. എന്നാൽ എന്നു മുതലാണ് സർവീസ് ആരംഭിക്കുന്നതെന്ന് വ്യക്തമാക്കിയിട്ടില്ല. എറ്റവും ഉചിതമായ സമയത്ത് ഇത് നടപ്പാക്കുമെന്നാണ് ഉത്തരവിൽ പറയുന്നത്.
മംഗലാപുരത്ത് നിന്നും 6.15 നാണ് വന്ദേഭാരത് പുറപ്പെടുക. ഈ ട്രെയിൻ വൈകീട്ട് 3.5 ന് തിരുവനന്തപുരത്ത് എത്തിച്ചേരും. ഒരു മണിക്കൂറിന് ശേഷം 4.5 ന് തിരുവനന്തപുരത്ത് നിന്നും വന്ദേഭാരത് പുറപ്പെടും. ഇത് രാത്രി 12.40ന് മംഗലാപുരത്ത് എത്തിച്ചേരും. നിലവിലുള്ള സമയത്തിൽ മാറ്റം വരുത്താതെ മംഗലാപുരത്ത് നിന്ന് 45 മിനിട്ട് നേരത്തേ സർവീസ് ആരംഭിക്കുന്ന രീതിയിലാണ് സമയം ക്രമീകരിച്ചിരിക്കുന്നത്.
എറണാകുളം സ്റ്റേഷനിൽ പുറപ്പെടുന്നതിന് മൂന്ന് മിനിറ്റ് നേരത്തെ ട്രെയിൻ എത്തും. യാത്രികരുടെ നിരന്തര ആവശ്യം പരിഗണിച്ചാണ് സർവ്വീസ് നീട്ടിയത് എന്നാണ് വിവരം. മംഗലാപുരത്തേയ്‌ക്കുള്ള യാത്രികർക്ക് വന്ദേഭാരതിന്റെ സർവ്വീസ് നീട്ടിയത് ഏറെ ആശ്വാസകരമാണ്. കേരളത്തിന് ലഭിച്ച രണ്ടാമത്തെ വന്ദേഭാരതാണ് ആലപ്പുഴ വഴി സർവീസ് നടത്തുന്നത്. കോട്ടയം വഴി സർവ്വീസ് നടത്തുന്ന വന്ദേഭാരത് ആണ് കേരളത്തിന് ആദ്യം ലഭിച്ചത്. ആദ്യം കണ്ണൂർവരെയായിരുന്നു സർവ്വീസ്. പിന്നീട് ഇത് കാസർകോട്ടേയ്‌ക്ക് വ്യാപിപ്പിക്കുകയായിരുന്നു.
