കാസര്കോട്: രാജ്യ തലസ്ഥാനത്ത് സമരം നടത്താനല്ല, സംസ്ഥാനത്ത് ഭരണം നടത്താനാണ് കേരള ജനത എല്ഡിഎഫിന് വോട്ട് ചെയ്തതെന്ന് ബിജെപി ദേശീയ നിര്വാഹക സമിതി അംഗം പി.കെ. കൃഷ്ണദാസ് പറഞ്ഞു. തിരുവനന്തപുരത്താണ് സമരം നടത്താന് എല്ഡിഎഫ് തയാറാകേണ്ടത്. പിണറായി വിജയന് സര്ക്കാര് സര്വ രംഗത്തും പരാജയപ്പെട്ടു എന്ന പരസ്യ പ്രഖ്യാപനമാണ് ഇന്നലെ ദല്ഹിയില് നടന്ന ഇടതുമുന്നണിയുടെ സമരം.
ഭരിക്കാനറിയില്ലെങ്കില് രാജിവച്ചു പുറത്ത് പോകുന്നതാണ് പിണറായി വിജയന് ഉചിതമായ മാര്ഗ്ഗം. കഴിഞ്ഞ ഒമ്പതര വര്ഷം കേന്ദ്രത്തില് നികുതിയായി വികസന പ്രവര്ത്തനത്തിന് എത്ര കോടിയാണ് കേന്ദ്രം അനുവദിച്ചതെന്നും, ഇനി എത്ര കിട്ടേണ്ടതുണ്ടെന്നും മുഖ്യമന്ത്രി വ്യക്തമാക്കണം.
പ്ലാന് ബിയെകുറിച്ച് മൗനം പാലിക്കുന്നതിന് പകരം അതെന്തെന്ന് വ്യക്തമാക്കണം. ദല്ഹി സമരത്തിന് ചെലവാക്കിയ തുക സ്വന്തം കീശയില് നിന്ന് എടുക്കണം. എല്ലാം സ്വകാര്യമേഖലയ്ക്ക് അടിയറ വയ്ക്കുന്ന മാര്ക്സിസ്റ്റ് പാര്ട്ടിയുടെ പ്ലാന് നല്ലതാണ്. വിദ്യാഭ്യാസ മേഖലയില് സ്വകാര്യ മേഖല കടന്നു വരുന്നതിനെതിരെ ഡിവൈഎഫ്ഐ നടത്തിയ സമരത്തിലാണ് അഞ്ചു ഡിവൈഎഫ്ഐക്കാര് കൂത്തുപറമ്പില് കൊല്ലപ്പെട്ടത്. പുഷ്പന് ജീവിച്ചിരിക്കുന്ന രക്തസാക്ഷിയാണ്. വിദേശ സര്വകലാശാല പോലും അനുവദിക്കാന് തയാറാകുന്ന മാര്ക്സിസ്റ്റ് പാര്ട്ടി കൂത്ത്പറമ്പ് രക്തസാക്ഷികളോട് പരസ്യമായി മാപ്പ് ചോദിക്കണം, പി.കെ.കൃഷ്ണദാസ് പറഞ്ഞു.
