ഹൈദരാബാദ്: തെലങ്കാനയിലെ ഹൈദരാബാദിലെ വിവിധ സ്ഥലങ്ങളില്‍ ദേശീയ അന്വേഷണ ഏജന്‍സി (എന്‍ഐഎ) വ്യാഴാഴ്ച രാവിലെ റെയ്ഡ് നടത്തി. ഹൈദരബാദിലെ ഹിമായത് നഗര്‍, എല്‍ബി നഗര്‍ എന്നിവിടങ്ങളിലാണ് തിരച്ചില്‍ നടത്തിയത്.
എല്‍ഗാര്‍ പരിഷത്ത് കേസില്‍ മെഡിക്കല്‍ ജാമ്യത്തില്‍ കഴിയുന്ന തെലുങ്ക് കവി പ്രൊഫസര്‍ വരവര റാവുവിന്റെ അനന്തരവവും പ്രാദേശിക മാസികയുടെ എഡിറ്ററുമായ എന്‍. വേണുഗോപാലിന്റെ വസതിയില്‍ ഉദ്യോഗസ്ഥര്‍ റെയ്ഡ് ആരംഭിച്ചു. വേണുഗോപാലിന് മാവോയിസ്റ്റുകളുമായി ബന്ധമുണ്ടെന്ന് ആരോപിച്ചാണ് ഹിമായത്‌നഗറിലെ വസതിയില്‍ പരിശോധന നടത്തുന്നത്.
എല്‍ബി നഗറിലെ റോക്ക് ടൗണ്‍ കോളനിയില്‍ താമസിക്കുന്ന രവി ശര്‍മയുടെ വീട്ടിലും സമാനമായ റെയ്ഡ് നടത്തി. ശര്‍മ്മയുടെ മൊബൈലും പഴയ സാഹിത്യങ്ങളും ലഘുലേഖകളും ഇയാളില്‍ നിന്ന് പിടിച്ചെടുത്തതായി എന്‍ഐഎ വൃത്തങ്ങള്‍ അറിയിച്ചു. റെയ്ഡുകളുടെ കൂടുതല്‍ വിശദാംശങ്ങള്‍ക്ക് കാത്തിരിക്കുകയാണ്.
