ന്യൂദല്‍ഹി: ഭാരത ക്രിക്കറ്റ് താരം ഋഷഭ് പന്ത് വരുന്ന ഐപിഎല്‍ സീസണില്‍ മുഴുവന്‍ കളിയിലും കളിക്കാന്‍ ഒരുക്കമാണെന്ന് ടീം പരിശീലകനും ഓസ്‌ട്രേലിയയുടെ മുന്‍ ക്രിക്കറ്റ് നായകനുമായ റിക്കി പോണ്ടിങ്. താരത്തിന് വരുന്ന സീസണില്‍ മുഴുവന്‍ കളിയും കളിക്കാന്‍ സാധിച്ചേക്കും. പക്ഷെ വിക്കറ്റ് കാപ്പറായോ ടീം നായകനായോ കളത്തില്‍ ഉണ്ടാകുമെന്ന് ഉറപ്പു പറയാന്‍ തനിക്കാകില്ല. ടീമിനെ നയിക്കലും വിക്കറ്റ് കീപ്പിങ്ങും വലിയ ഉത്തരവാദിത്തം നിറഞ്ഞ കാര്യമാണ് ഇതിനാല്‍ ഈ ദൗത്യങ്ങളിലേക്ക് താരത്തെ ഉടനെ വിന്യസിക്കില്ലെന്നാണ് പോണ്ടിങ് പറഞ്ഞതിലെ ധ്വനി.
26കാരനായ പന്ത് 2022 ഡിസംബര്‍ 30ന് ഉണ്ടായ കാറപകടത്തിലാണ് ഗുരുതരമായി പരിക്കേറ്റ് വിശ്രമത്തിലായത്. ഇതേ തുടര്‍ന്ന് കഴിഞ്ഞ സീസണ്‍ ഐപിഎല്‍ മത്സരങ്ങള്‍ മുഴുവനായും താരത്തിന് നഷ്ടപ്പെട്ടിരുന്നു. ഏകദിന ലോകകപ്പില്‍ ഭാരതത്തിന്റെ ഭാഗമാകാനും താരത്തിന് സാധിച്ചില്ല.
