ഡെറാഡൂണ്‍:ഉത്തരാഖണ്ഡില്‍ ലിവ് ഇന്‍ റിലേഷന്‍ഷിപ്പിന് രജിട്രേഷന്‍ നിര്‍ബന്ധമാക്കുന്നു. ഇത്തരം ബന്ധം പരസ്യപ്പെടുത്തിയില്ലെങ്കില്‍ ആറ് മാസം വരെ തടവ് ശിക്ഷ ലഭിക്കുന്നതാണ് ഏകീകൃത സിവില്‍ കോഡ് ബില്ല്.
ഒരുമിച്ച് ജീവിക്കാന്‍ തീരുമാനിക്കുന്നവര്‍ 21 വയസിന് താഴെ പ്രായമുളളവരാണെങ്കില്‍ മാതാപിതാക്കളുടെ അനുമതി വേണം. നിയമം ലംഘിച്ചാല്‍ ആറുമാസം തടവോ 25,000 രൂപ പിഴയോ ലഭിക്കും. ലിവ് ഇന്‍ റിലേഷന്‍ ബന്ധം മറച്ചുവെക്കുകയോ വ്യാജ വിവരങ്ങള്‍ നല്‍കുകയോ ചെയ്താല്‍ മൂന്നുമാസം വരെ തടവും 25,000 രൂപയില്‍ കൂടാത്ത പിഴയോ,രണ്ടും കൂടിയോ അനുഭവിക്കേണ്ടി വരും. രജിസ്റ്റര്‍ ചെയ്യാന്‍ ഒരു മാസം വൈകിയാല്‍ മൂന്ന് മാസം വരെ തടവോ 10,000 രൂപ പിഴയോ അല്ലെങ്കില്‍ രണ്ടും കൂടിയോ ലഭിക്കും.
ഉത്തരാഖണ്ഡ് സ്വദേശികള്‍ മറ്റ് സംസ്ഥാനങ്ങളില്‍ ലിവ് ഇന്‍ റിലേഷന്‍ ബന്ധത്തിലാണെങ്കിലും അവര്‍ക്കും നിയമം ബാധകമാണ്. ലിവ് ഇന്‍ ടുഗെതര്‍ ബന്ധങ്ങള്‍ അവസാനിപ്പിക്കുകയാണെങ്കിലും രേഖാമൂലം അറിയിക്കണം. ലിവ്-ഇന്‍ ബന്ധങ്ങളില്‍ ജനിക്കുന്ന കുട്ടികള്‍ക്ക് നിയമപരമായ അംഗീകാരം ഉണ്ടാകും.
