ഗച്ചിബൗളി: സീസണില് ഇതുവരെ തോറ്റിട്ടില്ലാത്ത എഫ്സി ഗോവയ്ക്ക് ഇന്ത്യന് സൂപ്പര് ലീഗ്(ഐഎസ്എല്) രണ്ടാം ഘട്ടത്തില് ഗംഭീര തുടക്കം. ഇന്നലെ നടന്ന മത്സരത്തില് ഹൈദരാബാദിനെ തോല്പ്പിച്ചത് എതിരില്ലാത്ത രണ്ട് ഗോളുകള്ക്ക്.
സീസണില് പാടെ മങ്ങിപ്പോയ ഹൈദരാബാദ് എഫ്സിയുടെ പരിശീലകനെ പുറത്താക്കിയ ശേഷമുള്ള ആദ്യ മത്സരം കൂടിയായിരുന്നു ഇന്നലത്തേത്. അവര്ക്കെതിരെ ഇന്നലെ മികച്ച മത്സരമാണ് ഗോവ പയറ്റിയത്. ആദ്യ പകുതിയില് തന്നെ ഗോവ മത്സരത്തിലെ രണ്ട് ഗോളുകളും നേടി. സ്ട്രൈക്കര് കാര്ലോസ് മാര്ട്ടിനെസ് ഇരട്ടഗോളിലാണ് ടീം വിജയം സ്വന്തമാക്കിയത്. തുടക്കത്തിലേ തന്നെ ഗോള് നേടിയ ഗോവ വൈകാതെ രണ്ടാം ഗോളും നേടി. ആദ്യ ഗോള് ഏഴാം മിനിറ്റിലായിരുന്നു. രണ്ടാമത്തേത് 30-ാം മിനിറ്റിലും.
ജയത്തോടെ 11 കളികളില് നിന്ന് എട്ട് ജയത്തിന്റെ ബലത്തില് 27 പോയിന്റാണ് ഗോവ ഇതുവരെ നേടിയത്. ബ്ലാസ്റ്റേഴ്സിന്റെ 26 പോയിന്റിനെ മറികടന്ന് ഒന്നാം സ്ഥാനത്തേക്ക് വീണ്ടുമെത്തി. ഇതുവരെയുള്ള കളികളില് മൂന്ന് സമനില വഴങ്ങിയതല്ലാതെ ഒരു കളിയില് പോലും പരാജയപ്പെട്ടിട്ടില്ല. സീസണില് ഇതുവരെ തോല്ക്കാത്ത ഏകടീം ഗോവയാണ്.
പ്രതികരിക്കാൻ ഇവിടെ എഴുതുക: