തമിഴ് ചലച്ചിത്ര മേഖലയിലെ ഏറെ ആരാധക പിന്തുണയുള്ള താരജോഡികളാണ് സൂര്യയും ജ്യോതികയും. ഏറെ നാളത്തെ ദാമ്പത്യത്തിന് ഒടുവിൽ ഇരുവരും വേർപിരിയുന്നുവെന്ന തരത്തിലുള്ള അഭ്യൂഹങ്ങളും ആരാധകർക്കിടയിൽ നിറഞ്ഞിരുന്നു. ജ്യോതിക മക്കളുമായി മുംബൈയിലേക്ക് താമസം മാറാൻ തീരുമാനിച്ചതോടെയാണ് ഊഹാപോഹങ്ങൾ സജീവമായത്.
എന്നാൽ, ഇപ്പോൾ ജ്യോതിക പങ്കുവച്ച വീഡിയോയാണ് കിംവദന്തികൾക്ക് വിരാമമിട്ട് ശ്രദ്ധനേടുന്നത്. സൂര്യയോടൊപ്പം ഫിൻലാൻഡിൽ അവധിക്കാലം ആഘോഷിക്കുന്ന വീഡിയോയാണ് താരം ഇൻസ്റ്റഗ്രാമിൽ പങ്കുവച്ചത്.
മഞ്ഞുപെയ്യുന്ന ഫിൻലാൻഡിൽ അവധിക്കാലം ആഘോഷിക്കുന്ന ഇരുവരെയും വീഡിയോയിൽ കാണാം. “ജീവിതം ഒരു മഴവില്ല് പോലെയാണ്. നമുക്ക് അതിന്റെ നിറങ്ങൾ കണ്ടുപിടിക്കാൻ തുടങ്ങാം” ജ്യോതിക വീഡിയോയിൽ കുറിച്ചു.
https://www.instagram.com/p/C2r6uCsygfC/
ജ്യോതിക മുംബൈയിലേക്ക് മാറിയതായി കുറച്ച്കാലം മുൻപ് അഭ്യൂഹങ്ങളുണ്ടായിരുന്നു. എന്നാൽ, സ്ഥലംമാറിയത് താൽക്കാലികമാണെന്നും മാതാപിതാക്കളുടെ ആരോഗ്യപ്രശ്നങ്ങൾ കാരണമാണ് ഈ സ്ഥലംമാറ്റമെന്നും ജ്യോതിക പിന്നീട് പറഞ്ഞിരുന്നു.
“കോവിഡ് മഹാമാരി സമയത്ത്, എന്റെ മാതാപിതാക്കൾക്ക് രണ്ടോ മൂന്നോ തവണ വൈറസ് ബാധിച്ചു, യാത്രാ നിയന്ത്രണങ്ങളാൽ എനിക്ക് അവരോടൊപ്പം സമയം ചിലവഴിക്കാൻ കഴിഞ്ഞില്ല. എന്റെ കുടുംബത്തിൽ നിന്ന് അകന്ന്, കഴിഞ്ഞ 25-27 വർഷമായി ചെന്നൈയിലാണ് ചെലവഴിച്ചത്. ആ വിടവ് നികത്താനും അവരുമായി അടുത്തിടപഴകാനും സമയമായെന്ന് എനിക്ക് തോന്നി,” ജ്യോതിക ഒരു അഭിമുഖത്തിൽ പറഞ്ഞതായി മനോരമ ഓൺലൈൻ റിപ്പോർട്ട് ചെയ്തു.
“സൂര്യ വളരെ പിന്തുണ നൽകുന്ന ഭർത്താവാണ്. ഞാൻ സന്തോഷവതിയായിരിക്കണമെന്ന് അദ്ദേഹം ആഗ്രഹിക്കുന്നു, കുട്ടികളുടെ ക്ഷേമത്തിന് മുൻഗണന നൽകുന്ന വ്യക്തിയാണ് അദ്ദേഹം. വലിയ കാഴ്ചപ്പാടുകളുള്ള ആളുമാണ്,” ജ്യോതിക കൂട്ടിച്ചേർത്തു.
