തിരുവനന്തപുരം: എസ് എഫ് ഐ പ്രവര്‍ത്തകരുടെ കരിങ്കൊടി പ്രതിഷേധത്തെ തുടര്‍ന്ന് റോഡിലിരുന്ന് പ്രതിഷേധിച്ച ഗവര്‍ണര്‍ ആരിഫ് മുഹമ്മദ് ഖാനെ പരിഹസിച്ച് മന്ത്രി വി ശിവന്‍കുട്ടി.
റോഡിലെ ചൂടിന് സോഡാ നാരങ്ങാ ബെസ്റ്റാ എന്ന ഒരു ഒറ്റവരി ഫേസ് ബുക് പോസ്റ്റിലൂടെയാണ് മന്ത്രിയുടെ പരിഹാസം. സോഡാ നാരങ്ങയുടെ ചിത്രവും ഈ ഒറ്റവരിയും മാത്രം ഉള്‍പ്പെടുത്തിയാണ് ശിവന്‍കുട്ടിയുടെ പരോക്ഷ പരിഹാസം.
മറ്റൊരു ഗവര്‍ണറും കാണിക്കാത്ത വെറും ഷോയെന്നാണ് ഗവര്‍ണറുടെ പ്രതിഷേധത്തെ കുറിച്ച് നേരത്തേ ശിവന്‍കുട്ടി മാധ്യമങ്ങളോട് പ്രതികരിച്ചത്.ഗവര്‍ണര്‍ മനപൂര്‍വം പ്രശ്നം സൃഷ്ടിക്കുകയാണ്. സമരങ്ങളും പ്രതിഷേധവും സ്വാഭാവികമാണെന്നും അത് നിയന്ത്രിക്കാന്‍ പൊലീസും സുരക്ഷാ ഉദ്യോഗസ്ഥരുമുണ്ടെന്നും ശിവന്‍കുട്ടി പറഞ്ഞു.
എസ്എഫ്ഐ പ്രവര്‍ത്തകര്‍ കൊല്ലത്തുവച്ച് ഗവര്‍ണറെ കരിങ്കൊടി കാട്ടിയതിന് പിന്നാലെയാണ് നാടകീയ സംഭവങ്ങള്‍ ഉണ്ടായത്. കാറില്‍ നിന്നിറങ്ങിയ ഗവര്‍ണര്‍, എസ്എഫ്ഐ പ്രവര്‍ത്തകര്‍ക്കു നേരേ ക്ഷുഭിതനായി പാഞ്ഞടുത്തു. പൊലീസിനെ രൂക്ഷമായി ശകാരിക്കുകയും റോഡിനു സമീപത്തെ ചായക്കടയുടെ മുന്നില്‍ കസേരയിട്ടിരുന്ന് പ്രതിഷേധിക്കുകയും ചെയ്തു. തുടര്‍ന്ന് പ്രതിഷേധക്കാര്‍ക്ക് എതിരെ ജാമ്യമില്ലാ വകുപ്പുകള്‍ ചുമത്തിയതിന് പിന്നാലെയാണ് ഗവര്‍ണര്‍ പ്രതിഷേധം അവസാനിപ്പിച്ചത്.
