മലപ്പുറം : സ്‌കൂള്‍ വിദ്യാര്‍ത്ഥികളുടെ ഉച്ചഭക്ഷണത്തിനായുള്ള അരി കടത്തിയ അധ്യാപകരെ സസ്പെന്ഡ് ചെയ്തു. മലപ്പുറം മൊറയൂര്‍ വിഎച്ച്എം ഹയര്‍ സെക്കന്‍ഡറി സ്‌കൂളിലെ പ്രധാന അധ്യാപകന്‍ ഉള്‍പ്പെടെ നാല്് അധ്യാപകരെയാണ് സസ്പെന്ഡ് ചെയ്തത്.
പ്രധാന അധ്യാപകന്‍ ശ്രീകാന്ത്, കായിക അധ്യാപകന്‍ രവീന്ദ്രന്‍ ഉച്ചഭക്ഷണ ചുമതലയുള്ള അധ്യാപകരായ ഇര്‍ഷാദ് അലി, ഭവനീഷ് എന്നിവരെയാണ് സസ്പെന്ഡ് ചെയ്തത്. രാത്രിയില്‍ അരി സൂക്ഷിച്ച മുറിയില്‍ നിന്നും ചാക്കുകള്‍ മറ്റെരു വാഹനത്തിലേക്ക് കടത്തുന്ന ദൃശ്യങ്ങളും പുറത്തുവരികയും സംഭവം വിവാദമാവുകയും ചെയ്തിരുന്നു. തുടര്‍ന്ന് മൊറയൂര്‍ പഞ്ചായത്ത് അംഗവും സ്‌കൂളിലെ വിദ്യാര്‍ത്ഥിയുടെ പിതാവുമായ ഹസൈനാര്‍ ബാബു നല്‍കിയ പരാതിയില്‍ മലപ്പുറം വിദ്യാഭ്യാസ ഡെപ്യൂട്ടി ഡയറക്ടറുടേതാണ് നടപടി.
ഉച്ചക്കഞ്ഞി ആവശ്യമില്ലാത്ത കുട്ടികളോട് സമ്മത പത്രം ഒപ്പിട്ട് വാങ്ങി സര്‍ക്കാരില്‍ നിന്ന് കിട്ടുന്ന അരി വിഹിതത്തില്‍ കൂടുതലുള്ളത് നാല്‍വര്‍ സംഘം ചേര്‍ന്ന് കടത്തുകയായിരുന്നു. മുഖ്യമന്ത്രി, വിദ്യാഭ്യാസ മന്ത്രി, എന്‍സിസി ഡയറക്ടറേറ്റ് എന്നിവര്‍ക്കാണ് പരാതി നല്‍കിയത്. എന്നാല്‍ ദൃശ്യങ്ങളെ കുറിച്ച് അറിയില്ല, ആരോപണങ്ങള്‍ തെറ്റാണെന്നുമാണ് സ്‌കൂള്‍ മാനേജറും പ്രധാനാധ്യാപകനും പ്രതികരിച്ചിരുന്നത്.
