കോട്ടയം: കോതമംഗലം വാരപ്പെട്ടിയില് നിന്ന് കാണാതായ 12 വയസുളള പെണ്കുട്ടിയെ ചങ്ങനാശേരിയില് കണ്ടെത്തി. കെഎസ്ആര്ടിസി ബസ് സ്റ്റാന്റിലാണ് കുട്ടിയെ കണ്ടെത്തിയത്.
കുട്ടിയെ ചങ്ങനാശേരി പൊലീസ് കൂട്ടിക്കൊണ്ടുപോയി. കുട്ടിയെ കോതമംഗലത്ത് നിന്നുള്ള ബന്ധുക്കള്ക്ക് കൈമാറും. കുട്ടിയെ ആരും തട്ടിക്കൊണ്ടുപോയതല്ലെന്നാണ് പ്രാഥമിക വിവരം.
ഇന്ന് വൈകിട്ടാണ് വാരപ്പെട്ടിയിലെ വീട്ടില് അനുജനെ തനിച്ചാക്കി പെണ്കുട്ടി വീട്ടില് നിന്ന് പോയത്. തോളില് ബാഗും തൂക്കി റോഡരികിലൂടെ കുട്ടി നടന്നുപോകുന്ന സിസിടിവി ദൃശ്യങ്ങള് ലഭിച്ചിരുന്നു. കാണാതായെന്ന വിവരം ബന്ധുക്കള് പൊലീസില് അറിയിച്ചതിന് പിന്നാലെ നാടൊട്ടുക്ക് തിരച്ചില് നടത്തിവരവെ ആറ് മണിക്കൂറിന് ശേഷം കുട്ടിയെ ചങ്ങനാശേരിയില് കണ്ടെത്തുകയായിരുന്നു.
കുട്ടിയുടെ പക്കല് കുടുക്ക പൊട്ടിച്ച പണമുണ്ടായിരുന്നുവെന്നാണ് അറിയുന്നത്.ക്രിസ്തുമസ് പരീക്ഷയില് മാര്ക്ക് കുറഞ്ഞതിന്റെ പേരില് കുട്ടിയെ വീട്ടുകാര് വഴക്ക് പറഞ്ഞിരുന്നുവെന്നും അറിയുന്നു.
