പത്തനംതിട്ട: മതവിദ്വേഷം വളർത്താൻ ശ്രമിച്ചതിന് സിപിഐഎം പഞ്ചായത്ത് അംഗം അബിതയ്ക്കെതിരെ കേസെടുത്ത് പോലീസ്. നാരങ്ങാനം പഞ്ചായത്തംഗം അബിത ഭായിക്കെതിരെയാണ് ആറന്മുള പോലീസ് കേസെടുത്തിരിക്കുന്നത്.രാമക്ഷേത്രവുമായി ബന്ധപ്പെട്ട് അബിത മതവിദ്വേഷം പ്രചരിപ്പിക്കുന്ന തരത്തിൽ ഫേസ്ബുക്കിൽ പോസ്റ്റ് പങ്കുവച്ചിരുന്നു. ഇത് വിവാദമായതിന് പിന്നാലെയാണ് നടപടി.
സംഭവവുമായി ബന്ധപ്പെട്ട് ബിജെപി നൽകിയ പരാതിയുടെ അടിസ്ഥാനത്തിലാണ് ആറന്മുള പോലീസ് കേസെടുത്തിരിക്കുന്നത്. ‘അയോധ്യാ പ്രയാണം..ഇന്ത്യ കുതിക്കുന്നു’ എന്ന തലക്കെട്ടോടെ കഴിഞ്ഞ ദിവസം അബിത ഭായ് ഫേസ്ബുക്കിൽ ഒരു വിഡിയോ പോസ്റ്റ് ചെയ്തിരുന്നു. ശ്രീരാമന്റെ ഭക്തിഗാനത്തിന്റെ പശ്ചാത്തല സംഗീതമുള്ള വിഡിയോയിരുന്നു അത്. വിഡിയോയിൽ ഒരാൾ അർധനഗ്നനായി ഓടുന്നതും കാണാമായിരുന്നു. ഈ പോസ്റ്റ് വിവാദമായതിന് പിന്നാലെ അബിത പോസ്റ്റ് പിൻവലിച്ചിരുന്നു.
എന്നാൽ ഇതിന് പിന്നാലെയാണ് ബിജെപി ഇവർക്കെതിരെ പരാതി നൽകിയത്. ഹൈന്ദവ വിശ്വാസങ്ങളെ മുറിവേൽപ്പിക്കുന്ന തരത്തിൽ സമൂഹമാദ്ധ്യമങ്ങളിലൂടെ മോർഫ് ചെയ്ത വീഡിയോ പ്രചരിപ്പിക്കുന്നുവെന്നാണ് പരാതി. ഫേസ്ബുക്ക് പോസ്റ്റിൽ അബിത മതനിന്ദ നടത്തിയെന്നും നാട്ടിലെ സമാധാന അന്തരീക്ഷം തകർത്ത് വർഗീയ ചേരിതിരിവുണ്ടാക്കാനുള്ള ശ്രമമാണ് നടക്കുന്നതെന്നും പരാതിക്കാരനായ രതീഷ്കുമാർ പരാതായിൽ പറയുന്നു. തുടർന്ന്, മതവിദ്വേഷം വളർത്തിയതിന് ആറന്മുള പൊലീസ് അബിതയ്ക്കെതിരെ കേസെടുത്തു.
